Raqs Karne Ka Milaa Hukm Jo Dariyaanon Main..!!

raqs karane kaa milaa hukm jo dariyaao.n me.n


raqs karane kaa milaa hukm jo dariyaao.n me.n
ham ne Khush hoke bha.Nvar baa.Ndh liye paon me.n

[raqs = dance; bha.Nvar = whirlpool]

un ko bhii hai kisii bhiige hue manzar kii talaash
buu.Nd tak bo na sake jo kabhii saharaao.n me.n

[manzar = scene; talaash = search; bo = sow; saharaa = desert]

ai mere ham-safaro.n tum bhii thaake-haare ho
dhuup kii tum to milaavaT na karo chaao.n me.n

jo bhii aataa hai bataataa hai nayaa ko_ii ilaaj
baT na jaaye teraa biimaar masiihaao.n me.n

hausalaa kis me.n hai yusuf kii Khariidaarii kaa
ab to maha.ngaa_ii ke charche hai zulaiKhaao.n me.n

[hausalaa = strength]

Moderator's note:
References to Yusuf and Zulaikha can be
found in various ghazals and nazms. Yusuf (Joseph), son of
Yaqub (Jacob) was a very handsome man. He was sold in
market of Egypt where he was bought by Zulaikha. Zulaikha
married him after her husband died.


jis barahaman ne kahaa hai ke ye saal achchhaa hai
us ko dafnaao mere haath kii rekhaao.n me.n


Moderator's note:
The first misra (line) is obviously a reference to Ghalib's
"ik barhamin ne kahaa hai ki ye saal achchhaa hai"


vo Khudaa hai kisii TuuTe hue dil me.n hogaa
masjido.n me.n use Dhuu.NDho na kaliisaao.n me.n

[kaliisaa = church]

ham ko aapas me.n muhabbat nahii.n karane dete
ik yahii aib hai is shahar ke daanaao.n me.n

[aib = fault; daanaa = wise men]

mujh se karate hai.n "Qateel" is liye kuch log hasad
kyo.n mere sher hai.n maqabuul hasiinaao.n me.n

[hasad = envy/jealousy; maqabuul = accepted (popular

...........

sadamaa to hai mujhe bhii ki tujhase judaa huu.N mai.n


sadamaa to hai mujhe bhii ki tujhase judaa huu.N mai.n
lekin ye sochataa huu.N ki ab teraa kyaa huu.N mai.n


bikharaa pa.Daa hai tere hii ghar me.n teraa vajuud
bekaar mahafilo.n me.n tujhe Dhuu.NDhataa huu.N mai.n


mai.n Khudakashii ke jurm kaa karataa huu.n aitaraaf
apane badan kii qabr me.n kabase ga.Daa huu.N mai.n


kis-kisakaa naam lauu.N zabaa.N par ki tere saath
har roz ek shaKhs nayaa dekhataa huu.N mai.n


naa jaane kis adaa se liyaa tuune mera naam
duniyaa samajh rahii hai ke sab kuchh teraa huu.N mai.n


le mere tajurbo.n se sabak ae mere raqiib
do chaar saal umr me.n tujhase ba.Daa huu.N mai.n


jaagaa huaa zamiir vo aaiinaa hai "Qateel"
sone se pahale roz jise dekhataa huu.N mai.n

...............

shaam ke saa.Nvale chehare ko nikhaaraa jaaye

shaam ke saa.Nvale chehare ko nikhaaraa jaaye
kyo.n na saagar se ko_ii chaa.Nd ubhaaraa jaaye


raas aayaa nahii.n taskii.n kaa saahil ko_ii
phir mujhe pyaas ke dariyaa me.n utaaraa jaaye


meharabaa.N terii nazar, terii adaaye.n qaatil
tujhako kis naam se ai dost pukaaraa jaye


mujhako Dar hai tere vaade pe bharosaa karake
muft me.n ye dil-e-Khushafaham na maaraa jaaye


jisake dam se tere din-raat daraKhshaa.N the "Qateel"
kaise ab us ke binaa vaqt guzaaraa jaaye

.............