Yeh Jo Deewane Se Do Chaar Nazar Aatey Hain..!!

ye jo diivaane se do chaar nazar aate hai.n


ye jo diivaane se do chaar nazar aate hai.n
in me.n kuchh saahib-e-asraar nazar aate hai.n

terii mahafil kaa bharam rakahate hai.n so jaat ehai.n
varnaa ye log to bedaar nazar aate hai.n

duur tak ko_ii sitaaraa hai na ko_ii juganuu
marg-e-ummiid ke aasaar nazar aate hai.n

mere daaman me.n sharaaro.n ke sivaa kuchh bhii nahii.n
aap phuulo.n ke Khariidaar nazar aate hai.n

kal jise chhuu nahii.n sakatii thii farishto.n kii nazar
aaj vo raunaq-e-baazaar nazar aate hai.n

hashr me.n kaun gavaahii merii degaa 'Sagar'
sab tumhaare hii taraf_Daar nazar aate hai.n


...............

terii duniyaa me.n yaa rab ziist ke saamaan jalate hai.n


terii duniyaa me.n yaa rab ziist ke saamaan jalate hai.n
fareb-e-zindagii kii aag me.n i.nsaan jalate hai.n

dilo.n me.n azamat-e-tauhiid ke diipak fasurdaa hai.n
jabiino.n par riyaa-o-kubr ke saamaan jalate hai.n

havas kii barayaabii hai Khirad-ma.ndo.n kii mahafil me.n
rupahalii Tikaliyo.n kii oT me.n imaan jalate hai.n

havaadis raqs-farmaa hai.n qayaamat muskuraatii hai
sunaa hai naaKhudaa ke naam se tuufaan jalate hai.n

shaguufe jhuulate hai.n is chaman me.n bhuuk ke jhuule
bahaaro.n me.n nasheman to bahar-e-unavaan jalatae hai.n

kahii.n aazeb kii chhan-chhan me.n majabuurii ta.Dapatii hai
riyaa dam to.D detii hai sunehare daan jalate hai.n

manaao jashn-e-may-noshii bikharaao zulf-e-mayakhaanaa
ibaadat se to "Sagar" dahar ke shaitaan jalate hai.n

............

vo bulaaye.n to kyaa tamaashaa ho


vo bulaaye.n to kyaa tamaashaa ho
ham na jaaye.n to kyaa tamaashaa ho

ye kinaaro.n se khelane vaale
Duub jaaye.n to kyaa tamaashaa ho

bandaa_parvar jo ham pe guzarii hai
ham bataaye.n to kyaa tamaashaa ho

aaj ham bhii terii vafaao.n par
muskuraaye.n to kyaa tamaashaa ho

terii suurat jo ittefaaq se ham
bhuul jaaye.n to kyaa tamaashaa ho

vaqt kii chand sa'ate.n 'Sagar'
lauT aaye.n to kyaa tamaashaa ho


Posted By : MrTzA

Hai Dua Yaad Magar Harf-E-Dua Yaad Nahin..!!

hai duaa yaad magar harf-e-duaa yaad nahii.n


hai duaa yaad magar harf-e-duaa yaad nahii.n
mere naGmaat ko a.ndaaz-e-navaa yaad nahii.n

mai.n ne palako.n se dar-e-yaar pe dastak dii hai
mai.n vo saahil huu.N jise ko_ii sadaa yaad nahii.n

mai.n ne jin ke liye raaho.n me.n bichhayaa thaa lahuu
ham se kahate hai.n vahii ahad-e-vafaa yaad nahii.n

kaise bhar aa_ii.n sar-e-shaam kisii kii aa.Nkhe.n
kaise tharraa_e charaaGo.n kii ziyaa yaad nahii.n

sirf dhu.ndhalaa_ii sitaaro.n kii chamak dekhii hai
kab huaa kaun huaa kis se Khafaa yaad nahii.n

zindagii jabr-e-musalasal kii tarah kaTatii hai
jaane kis jurm kii paa_ii hai sazaa yaad nahii.n

aao ik sajdaa kare.n aalam-e-madhahoshii me.n
kahate hai.n ke "Sagar" ko Khudaa yaad nahii.n.

............

ruudaad-e-muhabbat kyaa kahiye kuchh yaad rahii kuchh bhuul gaye


ruudaad-e-muhabbat kyaa kahiye kuchh yaad rahii kuchh bhuul gaye
do din kii masarrat kyaa kahiye kuchh yaad rahii kuchh bhuul gaye

[ruudaad-e-muhabbat=tale of love; masarrat=happiness]

jab jaam diyaa thaa saaqii ne jab daur chalaa thaa mahafil me.n
vo hosh kii sa'at kyaa kahiye kuchh yaad rahii kuchh bhuul gaye

[sa'at=moment]

ehasaas ke maiKhaane me.n kahaa.N ab fikr-o-nazar kii qandiile.n
aalam kii shiddat kyaa kahiye kuchh yaad rahii kuchh bhuul gaye

[fikr-o-nazar=point of view; qandile.n=lamps/candles]
[aalam=sorrow; shiddat=intensity]

ab apanii haqiiqat bhii "Sagar" berabt kahaanii lagatii hai
duniyaa kii haqiiqat kyaa kahiye kuchh yaad rahii kuchh bhuul gaye

[berabt=unrelated].

.............

tere daaman kii havaa maa.Ngate hai.n


tere daaman kii havaa maa.Ngate hai.n
ham bhii jiine kii duaa maa.Ngate hai.n

mutribo ko_ii achhuutaa naGmaa
saaz aaha.ng-o-sadaa maa.Ngate hai.n

maah-o-a.njum ke jharoke aksar
kisii ke aariz kii duaa maa.Ngate hai.n

phir pata.ngo.n me.n Khudaa_ii jaagii
shole hashr-numaa maa.Ngate hai.n

ba.ndaa-paravar ko_ii Khairaat nahii.n
ham vafaao.n kaa silaa maa.Ngate hai.n

maikadaa ho ke kaliisaa "Sagar"
saarii duniyaa kaa bhalaa maa.Ngate hai.n


Posted By : MrTzA

Ek Wada Hai Kisi Ka..!!

ek vaadaa hai kisii kaa jo vafaa hotaa nahii.n


ek vaadaa hai kisii kaa jo vafaa hotaa nahii.n
marmarii taaro.n bharii raato.n me.n kyaa hotaa nahii.n

jii me.n aataa hai ulaT de.n un ke chehare se naqaab
hausalaa karate hai.n lekin hausalaa hotaa nahii.n

shamaa jis kii aabaruu par jaan de de jhuum kar
vo patangaa jal to jaataa hai fanaa hotaa nahii.n

..........

ek muddat hu_ii ek zamaanaa huaa


ek muddat hu_ii ek zamaanaa huaa
Khaak-e-gulashan me.n jab aashiyaanaa huaa

zulf-e-baraham kii jab se shanaasaa_ii hu_ii
zindagii kaa chalan mujremaanaa huaa

phuul jalate rahe chaa.Nd ha.Nsate rahaa
aarazuu kaa muqammal fasaanaa huaa

daaG dil ke shaha.nshaah ke sikke bane
dil kaa muflis-kadaa jab Khazaanaa huaa

rah_bar ne palaT kar na dekhaa kabhii
rahr-o-raaste kaa nishaanaa huaa

ham jahaa.N bhii gaye zauq-e-sajdaa liye
har jagah aap kaa aasataanaa huaa

dekh mizaraab se Khuun Tapakane lagaa
saaz kaa taar marG-e-taraanaa huaa

pahale hotii thii ko_ii vafaa-paravarii
ab to "SaaGar" ye qissaa puraanaa huaa..

.............

dukh dard kii sauGaat hai duniyaa terii kyaa hai


dukh dard kii sauGaat hai duniyaa terii kyaa hai
ashko.n se bharii raat hai duniyaa terii kyaa hai

kuchh log yahaa.N nuur-e-sahar Dhuu.NDh rahe hai.n
taariik sii ik raat hai duniyaa terii kyaa hai

paaband-e-mashiyat hai tanaffus bhii nazar bhii
ik jaziyaa-e-lamhaat hai duniyaa terii kyaa hai

taqadiir ke chehare kii shikan dekh rahaa huu.N
aa_iinaa-e-haalaat hai duniyaa terii kyaa hai

majaruuh-e-taqaddus hai taqaddus kii haqiiqat
ruudaad-e-Kharaabaat hai duniyaa terii kyaa hai

"Sagar" me.n chhalakate hai.n samavaat ke isaraar
saaqii kii karaamaat hai duniyaa terii kyaa hai

.0...........

Posted By : MrTzA

Chupaye Dil Mein Ghamon Ka Jahaan Baithe Hain..!!

bhuulii hu_ii sadaa huu.N mujhe yaad kiijiye


bhuulii hu_ii sadaa huu.N mujhe yaad kiijiye
tum se kahii.n milaa huu.N mujhe yaad kiijiye

ma.nzil nahii.n huu.N Khizr nahii.n rahazan nahii.n
ma.nzil kaa ra.ntaa huu.N mujhe yaad kiijiye

merii nigaah-e-shauq se har gul hai devataa
mai.n ishq kaa Khudaa huu.N mujhe yaad kiijiye

naGmo.n kii ibtidaa thii kabhii mere naam se
ashko.n kii i.ntahaa huu.N mujhe yaad kiijiye

gum-sum kha.Dii hai.n dono.n jahaan kii haqiiqate.n
mai.n un se kah rahaa huu.N mujhe yaad kiijiye

"Sagar" kisii ke husn-e-taGaaful shaar kii
bahakii hu_ii adaa huu.N mujhe yaad kiijiye ..

.............


chaa.Ndanii ko rusuul kahataa huu.N


chaa.Ndanii ko rusuul kahataa huu.N
baat ko baa_usuul kahataa huu.N

jagamagaate hue sitaaro.n ko
tere pairo.n kii dhuul kahataa huu.N

jo chaman kii hayaat ko Das le
us kalii ko babuul kahataa huu.N

ittefaaqan tumhaare milane ko
zindagii kaa husuul kahataa huu.N

aap kii saa.Nvalii sii suurat ko
zauq-e-yazdaa.N kii bhuul kahataa huu.N

jab mayassar ho saaGar-o-miinaa
barq_paaro.n ko phuul kahataa huu.N

.......

chhupaaye dil me.n Gamo.n kaa jahaan baiThe hai.n


chhupaaye dil me.n Gamo.n kaa jahaan baiThe hai.n
tumhaarii bazm me.n ham bezabaan baiThe hai.n

ye aur baat ki manzil pe ham pahu.Nch na sake
magar ye kam hai ki raaho.n ko chhaan baiThe hai.n

fuGaa.N hai dard hai soz-o-firaaq-o-daaG-e-alam
abhii to ghar me.n bahut meharabaan baiThe hai.n

ab aur gardish-e-taqadiir kyaa sataayegii
luTaa ke ishq me.n naam-o-nishaan baiThe hai.n

vo ek lafz-e-mohabbat hii dil kaa dushman hai
jise shariat-e-ehasaas maan baiThe hai.n

hai maikado.n kii bahaaro.n se dostii 'Sagar'
baraaye had-e-yaqiin-o-gumaan baiThe hai.n


Posted By : MrTzA

Baat Pholon Ki Suna Karte They..!!

azmat-e-zindagii ko bech diyaa


azmat-e-zindagii ko bech diyaa
ham ne apanii Khushii ko bech diyaa

chashm-e-saaqii ke ik ishaare pe
umr kii tishnagi ko bech diyaa

rind jaam-o-subuu pe ha.Nsate hai.n
shaiKh ne bandagii ko bech diyaa

rah_guzaaro.n pe luT ga_ii raadhaa
shaam ne baa.Nsurii ko bech diyaa

jagamagaate hai.n vahashato.n ke dayaar
aql ne aadamii ko bech diyaa

lab-o-ruKhsaar ke ivaz ham ne
sitvat-e-Khusravii ko bech diyaa

ishq beharuupiyaa hai ai 'Sagar'
aap ne saadagii ko bech diyaa.

.............

baat phuulo.n kii sunaa karate the


baat phuulo.n kii sunaa karate the
ham kabhii sher kahaa karate the

mashaale.n leke tumhaare Gam kii
ham andhero.n me.n chalaa karate the

ab kahaa.N aisii tabiyat vaale
choT khaa kar jo duaa karate the

tark-e-ehasaas-e-muhabbat mushkil
haa.N magar ahal-e-vafaa karate the

bikharii bikharii zulfo.n vaale
qaafile rok liyaa karate the

aaj gulshan me.n shaguuf-e-saaGar
shikave baad-e-sabaa se karate the..

..............

bargashtaa-e-yazdaa.N se kuchh bhuul hu_ii hai


bargashtaa-e-yazdaa.N se kuchh bhuul hu_ii hai
bhaTake hue insaan se kuchh bhuul hu_ii hai

taa hadd-e-nazar shole hii shole hai.n chaman me.n
phuulo.n ke nigeh_baan se kuchh bhuul hu_ii hai

jis ahad me.n luT jaaye faqiiro.n kii kamaa_ii
us ahad ke sultaan se kuchh bhuul hu_ii hai

ha.NSate hai.n merii suurat-e-maftuu.N pe shaguufe
mere dil-e-naadaan se kuchh bhuul hu_ii hai

huuro.n kii talab aur mai-o-saaGar se hai nafrat
zaahid tere irfaan se kuchh bhuul hu_ii hai.


Posted By : MrTzA