Dusman Ko B Seenay Se Lagana Nahi Bholey..!!

dushman ko bhii siine se lagaanaa nahii.n bhuule


dushman ko bhii siine se lagaanaa nahii.n bhuule
ham apane buzurgo.n kaa zamaanaa nahii.n bhuule

tum aa.Nkho.n kii barasaat bachaaye huye rakhanaa
kuchh log abhii aag lagaanaa nahii.n bhuule

ye baat alag haath kalam ho gaye apane
ham aap kii tasviir banaanaa nahii.n bhuule

ik umr hu_ii mai.n to ha.Nsii bhuul chukaa huu.N
tum ab bhii mere dil ko dukhanaa nahii.n bhuule

...........

kaa.NTo.n se guzar jaanaa sholo.n se nikal jaanaa


kaa.NTo.n se guzar jaanaa sholo.n se nikal jaanaa
phuulo.n kii bastii me.n jaanaa to sambhal jaanaa

din apanii chiraaGo.n kii maanind guzarate hai.n
har subah ko bujh jaanaa har shaam jal jaanaa

bachcho.n hii si fitrat hai ham ahl-e-muhabbat kii
zid karanaa machal jaanaa phir Khud hii sambhal jaanaa

vo shaKhs bhalaa meraa kyaa saath nibhaayegaa
mausam kii tarah jis ne siikhaa hai badal jaanaa


..............

maanaa ke un ke nezo.n pe ab sar nahii.n ko_ii


maanaa ke un ke nezo.n pe ab sar nahii.n ko_ii
kyaa un ke aastiin me.n bhii Khanjar nahii.n ko_ii

majabuuriyo.n ne ghar se nikalane na diyaa
duniyaa samajh rahii hai meraa ghar nahii.n ko_ii

ab kyaa kare.nge ham naye suurajkii roshanii
jab dekhane ke vaaste manzar nahii.n ko_ii

dil ho rahaa hai der se Khaamosh jhiil saa
kyaa dosto.n ke haath me.n patthar nahii.n ko_ii

qismat sabhii kii vaqt ke haatho.n me.n rahatii hai
is daur me.n kisii kaa muqaddar nahii.n ko_ii