Wo Sahilon Pe Gaane Waley Kya Hue..!!

zabaa.N suKhan ko suKhan baa.Nkapan ko tarasegaa


zabaa.N suKhan ko suKhan baa.Nkapan ko tarasegaa
suKhan_kadaa merii tarz-e-suKhan ko tarasegaa

naye pyaale sahii tere daur me.n saaqii
ye daur merii sharaab-e-kohan ko tarasegaa

mujhe to Khair vatan chho.D ke aman na milii
vatan bhii mujh se Gariib-ul-vatan ko tarasegaa

unhii.n ke dam se farozaa.N hai.n millato.n ke charaaG
zamaanaa sohabat-e-arabaab-e-fan ko tarasegaa

badal sako to badal do ye baaG_baa.N varanaa
ye baaG saayaa-e-sard-o-samaa.N ko tarasegaa

havaa-e-zulm yahii hai to dekhanaa ek din
zamii.n paanii ko suuraj kiran ko tarasegaa..

................

ye bhii kyaa shaam-e-mulaaqaat aa_ii


ye bhii kyaa shaam-e-mulaaqaat aa_ii
lab pe mushkil se terii baat aa_ii

subah se chup hai.n tere hijr nasiib
haaye kyaa hogaa agar raat aa_ii

bastiyaa.N chho.D ke barase baadal
kis qayaamat kii ye barasaat aa_ii

ko_ii jab mil ke huaa thaa ruKhsat
dil-e-betaab vahii raat aa_ii

saayaa-e-zulf-e-butaa.N me.n 'Nasir'
ek se ek na_ii raat aa_ii.

.............

vo saahilo.n pe gaane vaale kyaa hue


vo saahilo.n pe gaane vaale kyaa hue
vo kashtiyaa.N jalaane vaale kyaa hue

[saahil = shore; kashtii = boat]

vo subah aate aate rah ga_ii kahaa.N
jo qaafile the aane vaale kyaa hue

[qaafilaa = caravan]

mai.n jin kii raah dekhataa huu.N raat bhar
vo raushanii dikhaane vaale kyaa hue

ye kaun log hai.n mere idhar udhar
vo dostii nibhaane vaale kyaa hue

imaarate.n to jal ke raakh ho ga_ii.n
imaarate.n banaane vaale kyaa hue

[imaarat = building; raakh = ashes]

ye aap ham to bojh hai.n zamiin kaa
zamii.n kaa bojh uThaane vaale kyaa hue

[bojh = burden]

..........

tuu hai yaa teraa saayaa hai


tuu hai yaa teraa saayaa hai
bhesh judaa_ii ne badalaa hai

dil kii havelii par muddat se
Khaamoshii kaa qufl pa.Daa hai

chiiKh rahe hai.n Khaalii kamare
shaam se kitanii tez havaa hai

daravaaze sar pho.D rahe hai.n
kaun is ghar ko chho.D gayaa hai

hichakii thamatii hii nahii.n 'Nasir'
aaj kisii ne yaad kiyaa hai.

.............

tere milane ko bekal ho gaye hai.n


tere milane ko bekal ho gaye hai.n
magar ye log paagal ho gaye hai.n

bahaare.n leke aaye the jahaa.N tum
vo ghar sun_saan jangal ho gaye hai.n

yahaa.N tak ba.Dh gaye aalaam-e-hastii
ki dil ke hausale shal ho gaye hai.n

kahaa.N tak taab laaye naatavaa.N dil
ki sadame ab musal_sal ho gaye hai.n

nigaah-e-yaas ko niind aa rahii hai
musardaa pur_ashk bojhal ho gaye hai.n

unhe.n sadiyo.n na bhuulegaa zamaanaa
yahaa.N jo haadase kal ho gaye hai.n

jinhe.n ham dekh kar jiite the 'Nasir'
vo log aa.Nkho.n se ojhal ho gaye hai.n

Phir sawan Rut Ki Pavan Chali Tum Yad aaye..!!

phir saavan rut kii pavan chalii tum yaad aaye


phir saavan rut kii pavan chalii tum yaad aaye
phir patto.n kii paazeb bajii tum yaad aaye

[paazeb = anklet (paayal)]

phir ku.Nje.n bolii.n ghaas ke hare samandar me.n
rut aa_ii piile phuulo.n kii tum yaad aaye

phir kaagaa bolaa ghar ke suune aa.Ngan me.n
phir amrat ras kii buu.Nd pa.Dii tum yaad aaye

pahale to mai.n chiiKh ke royaa aur phir ha.Nsane lagaa
baadal garjaa bijalii chamakii tum yaad aaye

din bhar to mai.n duniyaa ke dhandho.n me.n khoyaa rahaa
jab diivaaro.n se dhuup Dhalii tum yaad aaye

Niyaat-e-Shauq Bhar Na Jaaye Kahiin ..!!

'Nasir' kyaa kahataa phirataa hai kuchh na suno to behatar hai


'Nasir' kyaa kahataa phirataa hai kuchh na suno to behatar hai
diivaanaa hai diivaane ke muu.Nh na lago to behatar hai

kal jo thaa vo aaj nahii.n jo aaj hai kal miT jaayegaa
ruukhii-suukhii jo mil jaaye shukr karo to behatar hai

kal ye taab-o-tavaa.N na rahegii Tha.nDaa ho jaayegaa lahuu
naam-e-Khudaa ho javaa.N abhii kuchh kar guzaro to behatar hai

kyaa jaane kyaa rut badale haalaat kaa ko_ii Thiik nahii.n
ab ke safar me.n tum bhii hamaare saath chalo to behatar hai

kapa.De badal kar baal banaa kar kahaa.N chale ho kis ke liye
raat bahut kaalii hai 'Nasir' ghar me.n raho to behatar hai ..



............

niiyat-e-shauq bhar na jaaye kahii.n


niiyat-e-shauq bhar na jaaye kahii.n
tuu bhii dil se utar na jaaye kahii.n

aaj dekhaa hai tujhe der ke baad
aaj kaa din guzar na jaaye kahii.n

na milaa kar udaas logo.n se
husn teraa bikhar na jaaye kahii.n

aarazuu hai ke tuu yahaa.N aaye
aur phir umr bhar na jaaye kahii.n

jii jalaataa huu.N aur ye sochataa huu.N
raayegaa.N ye hunar na jaaye kahii.n

aao kuchh der ro hii le.n 'Nasir'
phir ye dariyaa utar na jaaye kahiin.

Naye Kapre Badal Kar Jaaon Kahan..!

naye kapa.De badal kar jaa_uu.N kahaa.N aur baal banaa_uu.N kis ke liye


naye kapa.De badal kar jaa_uu.N kahaa.N aur baal banaa_uu.N kis ke liye
vo shaKhs to shahar hii chho.D gayaa ab Khaak u.Daa_uu.N kis ke liye

jis dhuup kii dil ko Tha.nDak thii vo dhuup usii ke saath ga_ii
in jalatii bujhatii galiyo.n me.n ab Khaak u.Daa_uu.N kis ke liye

vo shahar me.n thaa to us ke liye auro.n se milanaa pa.Dataa thaa
ab aise-vaise logo.n ke mai.n naaz uThaa_uu.N kis ke liye

ab shahar me.n is kaa baadal hii nahii.n ko_ii vaisaa jaan-e-Gazal hii nahii.n
aivaan-e-Gazal me.n lafzo.n ke gul_daan sajaa_uu.N kis ke liye

muddat se ko_ii aayaa na gayaa sun_saan pa.Dii hai ghar kii fazaa
in Khaalii kamaro.n me.n 'Nasir' ab shammaa jalaa_uu.N kis ke liye


............

musal_sal bekalii dil ko rahii hai


musal_sal bekalii dil ko rahii hai
magar jiine kii suurat to rahii hai

mai.n kyuu.N phirataa huu.N tanhaa maaraa maaraa
ye bastii chain se kyo.n so rahii hai

chal dil se ummiido.n ke musaafir
ye nagarii aaj Khaalii ho rahii hai

na samajho tum ise shor-e-bahaaraa.N
Khizaa.N patto.n me.n chhup ke ro rahii hai


hamare ghar kii diivaaro.n pe 'Nasir'
udaasii baal khole so rahii hai

............

Kuch YaadGaar-e-Sheher-e-Sitan-Gar Hi Le Chalen..1!

kuchh yaadagaar-e-shahar-e-sitam_gar hii le chale.n


kuchh yaadagaar-e-shahar-e-sitam_gar hii le chale.n
aaye hai.n is galii me.n to patthar hii le chale.n

yuu.N kis tarah kaTegaa ka.Dii dhuup kaa safar
sar par Khayaal-e-yaar kii chaadar hii le chale.n

ranj-e-safar kii ko_ii nishaanii to paas ho
tho.Dii sii Khaak-e-kuuchaa-e-dil_bar hii le chale.n

ye kah ke chhe.Datii hai hame.n dil_giraftagii
ghabaraa gaye hai.n aap to bahar hii le chale.n

is shahar-e-becharaaG me.n jaayegii tuu kahaa.N
aa ai shab-e-firaaq tujhe ghar hii le chale.n3...

.........

mumkin nahii.n mataa-e-suKhan mujh se chhiin le


mumkin nahii.n mataa-e-suKhan mujh se chhiin le
go baaG_baa.N ye ka.nj-e-chaman mujh se chhiin le

gar ehataraam-e-rasm-e-vafaa hai to ai Khudaa
ye ehataraam-e-rasm-e-kohan mujh se chhiin le

manzar dil-o-nigaah ke jab ho gaye udaas
ye be-fazaa ilaaqaa-o-tan mujh se chiin le

gul_rez merii naalaakashii se hai shaaKh shaaKh
gul_chii.N kaa bas chale to ye fan mujh se chhiin le

sii.nchii hai.n dil ke Khuun se mai.n ne ye kyaariyaa.N
kis kii majaal meraa chaman mujh se chhiin le ..

Kuchh To Ehsaas-e-Ziyaan Tha Pehle ..!!

kuchh to ehasaas-e-ziyaa.N thaa pahale


kuchh to ehasaas-e-ziyaa.N thaa pahale
dil kaa ye haal kahaa.N thaa pahale

ab to manzil bhii hai Khud garm-e-safar
har qadam sang-e-nishaa.N thaa pahale

safar-e-shauq ke far_sang na puuchh
vaqt beqaid-e-makaa.N thaa pahale

ye alag baat ki Gam raas hai ab
is me.n andeshaa-e-jaa.N thaa pahale

yuu.N na ghabaraaye huye phirate the
dil ajab kunj-e-amaa.N thaa pahale

ab bhii tuu paas nahii.n hai lekin
is qadar duur kahaa.N thaa pahale

Dere Daale hai.n bagolo.n ne jahaa.N
us taraf chashm-e-ravaa.N thaa pahale

ab vo dariyaa na bastii na vo log
kyaa Khabar kaun kahaa.N thaa pahale

har Kharaabaa ye sadaa detaa hai
mai.n bhii aabaad makaa.N thaa pahale

kyaa se kyaa ho ga_ii duniyaa pyaare
tuu vahii.n par hai jahaa.N thaa pahale

ham ne aabaad kiyaa mulk-e-suKhan
kaisaa sun_saan samaa.N thaa pahale

ham ne baKhshii hai Khamoshii ko zubaa.N
dard majabuur-e-fuGaa.N thaa pahale

ham ne roshan kiyaa maamuur-e-Gam
varnaa har simt dhuaa.N thaa pahale

Gam ne phir dil ko jagaayaa 'Nasir'
Khaanaa_barbaad kahaa.N thaa pahale



...........

kitanaa kaam karenge


kitanaa kaam karenge
ab aaraam karenge

tere diye hue dukh
tere naam karenge

ahal-e-dard hii aaKhir
Khushiyaa.N aam karenge

kaun bachaa hai jise vo
zer-e-daam karenge

[zer-e-daam = trap/defeat]

naukarii chho.D ke "Nasir"
apanaa kaam karenge

........

Kisi Kali ne bhi Dekha Na Ankh Bhar k Mujhe..!!

kisii kalii ne bhii dekhaa na aa.Nkh bhar ke mujhe


kisii kalii ne bhii dekhaa na aa.Nkh bhar ke mujhe
guzar ga_ii jaras-e-gul udaas kar ke mujhe

mai.n so rahaa thaa kisii yaad ke shabistaa.N me.n
jagaa ke chho.D gaye qaafile sahar ke mujhe

mai.n ro rahaa thaa muqaddar kii saKht raaho.n me.n
u.Daa ke le gayaa jaaduu terii nazar kaa mujhe

mai.n terii dard kii tuGiyaaniyo.n me.n Duub gayaa
pukaarate rahe taare ubhar ubhar ke mujhe

tere firaaq kii raate.n kabhii na bhuule.ngii
maze mile inhii.n raato.n me.n umr bhar ke mujhe

zaraa sii der Thaharane de ai Gam-e-duniyaa
bulaa rahaa hai ko_ii baam se utar ke mujhe

phir aaj aa_ii thii ik mauj-e-havaa-e-tarab
sunaa ga_ii hai fasaane idhar-udhar ke mujhe ...

Hoti Hai Tere Naam Se Vehshat Kabhi Kabhi..!!

hotii hai tere naam se vahashat kabhii kabhii


hotii hai tere naam se vahashat kabhii kabhii
bar_ham hu_ii hai yuu.N bhii tabiiyat kabhii kabhii

[vahashat = anxiety; bar_ham = restless]

ai dil kise nasiib ye taufiiq-e-iztiraab
milatii hai zindagii me.n ye raahat kabhii kabhii

tere karam se ai alam-e-husn-e-aafrii.n
dil ban gayaa hai dost kii Khilvat kabhii kabhii

dil ko kahaa.N nasiib ye taufiiq-e-iztiraab
milatii hai zindagii me.n ye raahat kabhii kabhii

josh-e-junuu.N me.n dard kii tuGayaaniyo.n ke saath
ashko.n me.n Dhal ga_ii terii suurat kabhii kabhii

[tuGayaanii = storm]

tere qariib rah ke bhii dil mutama_iin na thaa
guzarii hai mujh pe bhii ye qayaamat kabhii kabhii

[mutama_iin = content/satisfied]

kuchh apanaa hosh thaa na tumhaaraa Khayal thaa
yuu.N bhii guzar ga_ii shab-e-furqat kabhii kabhii

[shab-e-furqat = night of separation]

ai dost ham ne tark-e-muhabbat ke baavajuud
mahasuus kii hai terii zaruurat kabhii kabhii

[tark-e-muhabbat = relinquishing of love; baavajuud = inspite of]


...............

giriftaa_dil hai.n bahut aaj tere diivaane


giriftaa_dil hai.n bahut aaj tere diivaane
Khudaa kare ko_ii tere sivaa na pahachaane

miTii miTii sii ummiide.n thake thake se Khayaal
bujhe bujhe se nigaaho.n me.n Gam ke afasaane

hazaar shukr ke ham ne zubaa.N se kuchh na kahaa
ye aur baat ke puuchhaa na ahal-e-duniyaa ne

baqadr-e-tashnaa_labii pursish-e-vafaa na hu_ii
chhalak ke rah gaye terii nazar ke paimaane

Khayaal aa gayaa maayuus rah_guzaaro.n kaa
palaT ke aa gaye manzil se tere diivaane

kahaa.N hai tuu ke tere intazaar me.n ai dost
tamaam raat sulagate rahe dil ke viiraane

ummiid-e-pursish-e-Gam kis se kiijiye 'Nasir'
jo mere dil pe guzaratii hai ko_ii kyaa jaane

..........

kaun is raah se guzarataa hai


kaun is raah se guzarataa hai
dil yuu.N hii intazaar karataa hai

dekh kar bhii na dekhane vaale
dil tujhe dekh-dekh Darataa hai

shahar-e-gul me.n kaTii hai saarii raat
dekhiye din kahaa.N guzarataa hai

dhyaan kii sii.Diiyo.n pe pichhale pahar
ko_ii chupake se paa.Nv dharataa hai

dil to meraa udaas hai 'Nasir'
shahar kyo.n saaye.n-saaye.n karataa hai

Gaye Dinon Ka Suraag Lekar..!!

gaye dino.n kaa suraaG lekar kidhar se aayaa kidhar gayaa vo


gaye dino.n kaa suraaG lekar kidhar se aayaa kidhar gayaa vo
ajiib maanuus ajanabii thaa mujhe to hairaan kar gayaa vo

Khushii kii rut ho ke Gam kaa mausum nazar use Dhuu.NDhatii hai har dam
vo buu-e-gul thaa ke naGmaa-e-jaan mere to dil me.n utar gayaa vo

vo maikade ko jagaanevaalaa vo raat kii niind u.Daanevaalaa
na jaane kyaa us ke jii me.n aa_ii ki shaam hote hii ghar gayaa vo

kuchh ab sambhalane lagii hai jaa.N bhii badal chalaa rang aasmaa.N bhii
jo raat bhaarii thii Tal ga_ii hai jo din ka.Daa thaa guzar gayaa vo

shikastaa_paa raah me.n kha.Daa huu.N gaye dino.n ko bulaa rahaa huu.N
jo qaafilaa meraa ham_safar thaa misl-e-gard-e-safar gayaa vo

bas ek manzil hai bul_havas kii hazaar raste hai.n ahal-e-dil ke
ye hii to hai farq mujh me.n us me.n guzar gayaa mai.n Thahar gayaa vo

vo jis ke shaane pe haath rakh kar safar kiyaa tuune mannzilo.n kaa
terii galii se na jaane kyuu.N aaj sar jhukaaye guzar gayaa vo

vo hijr ki raat kaa sitaara vo ham_nafas ham_suKhan hamaaraa
sadaa rahe us kaa naam pyaaraa sunaa hai kal raat mar gayaa vo

bas ek motii sii chhab dikhaakar bas ek miiThii sii dhun sunaa kar
sitaaraa-e-shaam ban ke aayaa barang-e-Khayaal-e-sahar gayaa vo

na ab vo yaado.n kaa cha.Dhataa dariyaa na fursato.n kii udaas barkhaa
yuu.N hii zaraa sii kasak hai dil me.n jo zaKhm gaharaa thaa bhar gayaa vo

vo raat kaa benavaa musaafir vo teraa shaayar vo teraa 'Nasir'
terii galii tak to ham ne dekhaa phir na jaane kidhar gayaa vo ..

Dil Mein ik Lehar Si uthii hai Abhi..!!

dil me.n ik lahar sii uThii hai abhii


dil me.n ik lahar sii uThii hai abhii
ko_ii taazaa havaa chalii hai abhii

shor barpaa hai Khaanaa-e-dil me.n
ko_ii diivaar sii girii hai abhii

[barpaa = arisen]

kuchh to naazuk mizaaj hai.n ham bhii
aur ye choT bhii na_ii hai abhii

[naazuk = delicate; mizaaj = temperament]
[choT = wound; na_ii = new]

bharii duniyaa me.n jii nahii.n lagataa
jaane kis chiiz kii kamii hai abhii

tuu shariik-e-suKhan nahii.n hai to kyaa
ham-suKhan terii Khaamoshii hai abhii

yaad ke be-nishaa.N jaziiro.n se
terii aavaaz aa rahii hai abhii

[jaziiraa = island]

shahar ke becharaaG galiyo.n me.n
zindagii tujh ko Dhuu.NDhatii hai abhii

[becharaaG = dark/without light]

so gaye log us havelii ke
ek khi.Dakii magar khulii hai abhii

[havelii = mansion]

tum to yaaro abhii se uTh baiThe
shahar me.n raat jaagatii hai abhii

vaqt achchhaa bhii aayegaa 'Nasir'
Gam na kar zindagii pa.Dii hai abhii


...............

safar-e-manzil-e-shab yaad nahii.n


safar-e-manzil-e-shab yaad nahii.n
log ruKhsat huye kab yaad nahii.n

[ruKhsat = to leave]

dil me.n har vaqt chubhan rahatii thii
thii mujhe kis kii talab yaad nahii.n

[talab = desire]

vo sitaaraa thii ke shabanam thii ke phuul
ik suurat thii ajab yaad nahii.n

[shabanam = dew]

aisaa ulajhaa huu.N Gam-e-duniyaa me.n
ek bhii Khvaab-e-tarab yaad nahii.n

[tarab = joy]

bhuulate jaate hai.n maazii ke dayaar
yaad aaye.n bhii to sab yaad nahii.n

[maazii = past; dayaar = place/residence]

ye haqiiqat hai ke ahabaab ko ham
yaad hii kab the ke ab yaad nahii.n

[haqiiqat = reality; ahabaab (plural of habiib) = friends]

yaad hai sair-e-charaaGaa.N "Nasir"
dii ke bujhane kaa sabab yaad nahii.n

[sair-e-charaaGaa.N = strolling through brightly illuminated paths]
[sabab = reason]

Dukh Ki Lehar ne chhedaa Hoga..!!

dukh kii lahar ne chhe.Daa hogaa


dukh kii lahar ne chhe.Daa hogaa
yaad ne ka.nka.D phe.nkaa hogaa

aaj to meraa dil kahataa hai
tuu is vaqt aakelaa hogaa

mere chuume hue haatho.n se
auro.n ko Khat likhataa hogaa

bhiig chalii.n ab raat kii palake.n
tuu ab thak kar soyaa hogaa

rel kii gaharii sii.nTii sun kar
raat kaa jangal guu.Njaa hogaa

shahar ke Khaalii sTeshan par
ko_ii musaafir utaraa hogaa

aa.Ngan me.n phir chi.Diyaa.N bole.n
tuu ab so kar uThaa hogaa

yaado.n kii jalatii shabanam se
phuul saa mukha.Daa dhoyaa hogaa

motii jaisii shaql banaakar
aa_iine ko takataa hogaa

shaam hu_ii ab tuu bhii shaayad
aapane ghar ko lauTaa hogaa

niilii dhundhalii Khaamoshii me.n
taaro.n kii dhun sunataa hogaa

meraa saathii shaam kaa taaraa
tujh se aa.Nkh milaataa hogaa

shaam ke chalate haath ne tujh ko
meraa salaam to bhejaa hogaa

pyaasii kurlaatii kuunjuu.N ne
meraa dukh to sunaayaa hogaa

mai.n to aaj bahut royaa huu.N
tuu bhii shaayad royaa hogaa

'Nasir' teraa miit puraanaa
tujh ko yaad to aataa hogaa ..

Dil Dharakne Ka Sabab Yaad aayaa..!!

dil dha.Dakane kaa sabab yaad aayaa


dil dha.Dakane kaa sabab yaad aayaa
vo terii yaad thii ab yaad aayaa

[sabab=reason]

aaj mushkil thaa sambhalanaa ai dost
tuu musiibat me.n ajab yaad aayaa

din guzaaraa thaa ba.Dii mushkil se
phir teraa vaadaa-e-shab yaad aayaa

[shab=night]

teraa bhuulaa huaa paimaan-e-vafaa
mar rahe.nge agar ab yaad aayaa

[paimaan=promise]

phir ka_ii log nazar se guzare
phir ko_ii shahar-e-tarab yaad aayaa

[tarab=happiness]

haal-e-dil ham bhii sunaate lekin
jab vo ruKhsat hue tab yaad aayaa

baiTh kar saayaa-e-gul me.n 'Nasir'
ham bahut roye vo jab yaad aayaa..

Dayaar-e-dil ki raat Mein..!!

dayaar-e-dil kii raat me.n chiraaG saa jalaa gayaa


dayaar-e-dil kii raat me.n chiraaG saa jalaa gayaa
milaa nahii.n to kyaa huaa vo shaql to dikhaa gayaa

[dayaar=place, residence]

judaa_io.n ke zaKhm dard-e-zindagii ne bhar diye
tujhe bhi niind aa ga_ii mujhe bhii sabr aa gayaa

ye subah kii safediyaa.N ye dopahar kii zardiyaa.N
ab aa_iine me.n deKhataa huu.N mai.n kahaa.N chalaa gayaa

pukaratii hai.n fursate.n kahaa.N ga_ii vo sohabate.n
zamii.n nigal ga_ii unhe.n yaa aasamaan khaa gayaa

vo dostii to Khair ab nasiib-e-dushmanaa.N hu_ii
vo chhoTii chhoTii ranjisho.n kaa lutf bhii chalaa gayaa

ye kis Khushii kii ret par Gamo.n ko niind aa ga_ii
vo lahar kis taraf ga_ii ye mai.n kahaa.N samaa gayaa

gaye dino.n kii laash par pa.De rahoge kab talak
uTho amal_kasho.n uTho ki aafataab sar pe aa gayaa..

Apni Dhun Mein Rehta Hoon..!!

apanii dhun me.n rahataa huu.N


apanii dhun me.n rahataa huu.N
mai.n bhii tere jaisaa huu.N

o pichhalii rut ke saathii
ab ke baras mai.n tanhaa huu.N

terii galii me.n saaraa din
dukh ke kankar chunataa huu.N

mujh se aa.Nkh milaaye kaun
mai.n teraa aa_iinaa huu.N

meraa diyaa jalaaye kaun
mai.n teraa Khaalii kamaraa huu.N

tuu jiivan kii bharii galii
mai.n jangal kaa rastaa huu.N

apanii lahar hai apanaa rog
dariyaa huu.N aur pyaasaa huu.N

aatii rut mujhe royegii
jaatii rut kaa jho.Nkaa huu.N..

Aaraa__ish-e-Khayaal bhi ho...!!

aaraa_ish-e-Khayaal bhii ho dil_kushaa bhii ho


aaraa_ish-e-Khayaal bhii ho dil_kushaa bhii ho
vo dard ab kahaa.N jise jii chaahataa bhii ho

ye kyaa ke roz ek saa Gam ek sii ummiid
is ranj-e-beKhumaar kii ab intehaa bhii ho

ye kyaa ke ek taur se guzare tamaam umr
jii chaahataa hai ab ko_ii tere sivaa bhii ho

Tuute kabhii to Khvaab-e-shab-o-roz kaa tilism
itane hujuum me.n ko_ii cheharaa nayaa bhii ho

diivaangii-e-shauq ko ye dhun hai in dino.n
ghar bhii ho aur be-dar-o-diivaar saa bhii ho

juz dil ko_ii makaan nahii.n dahar me.n jahaa.N
rah_zan kaa Khauf bhii na rahe dar khulaa bhii ho

har zarraa ek mahamiil-e-ibrat hai dasht kaa
lekin kise dikhaa_uu.N ko_ii dekhataa bhii ho

har shay pukaaratii hai pas-e-pardaa-e-sukuut
lekin kise sunaa_uu.N ko_ii ham_navaa bhii ho

fursat me.n sun shaguftagii-e-Gunchaa kii sadaa
ye vo suKhan nahii.n jo kisii ne kahaa bhii ho

baiThaa hai ek shaKhs mere paas der se
ko_ii bhalaa-saa ho to hame.n dekhataa bhii ho

bazm-e-suKhan bhii ho suKhan-e-garm ke liye
taa_uus bolataa ho to jangal haraa bhii ho..

Aaj To Be-Sabab Udaas Hai jee..!!

aaj to be-sabab udaas hai jii


aaj to be-sabab udaas hai jii
ishq hotaa to ko_ii baat bhii thii

jalataa phirataa huu.N kyuu.N do-paharo.n me.n
jaane kyaa chiiz kho ga_ii merii

vahii.n phirataa huu.N mai.n bhii Khaak ba-sar
is bhare shahar me.n hai ek galii

chhupataa phirataa hai ishq duniyaa se
phailatii jaa rahii hai rusvaa_ii

ham_nashii.n kyaa kahuu.N ke vo kyaa hai
chho.D ye baat niind u.Dane lagii

aaj to vo bhii kuchh Khaamosh saa thaa
mai.n ne bhii us se ko_ii baat na kii

ek dam us ke haath chuum liye
ye mujhe baiThe baiThe kyaa suujhii

tuu jo itanaa udaas hai 'Nasir'
tujhe kyaa ho gayaa bataa to sahii..