Zindagi tujh ko manaane nikaley

zindagii tujh ko manaane nikale


zindagii tujh ko manaane nikale
ham bhii kis darjaa diivaane nikale

[darjaa=type of, to what limit]

kuchh to dushman the muKhaalif-saf me.n
kuchh mere dost puraane nikale

[muKhaalif-saf=in the enemy camp]

nazar_andaaz kiyaa hai us ne
Khud se milane ke bahaane nikale

be-basaarat hai ye bastii yaaro
aa_iinaa kis ko dikhaane nikale

[be-basaarat=blind]

in andhero.n me.n jiyoge kab tak
ko_ii to shamaa jalaane nikale..

...............

aaj kii raat bhii guzarii hai merii kal kii tarah


aaj kii raat bhii guzarii hai merii kal kii tarah
haath aaye na sitaare tere aa.Nchal kii tarah

raat jalatii hu_ii ik aisii chitaa hai jis par
terii yaade.n hai.n sulagate huye sa.ndal kii tarah

tuu ki dariyaa hai magar merii tarah pyaasaa hai
mai.n tere paas chalaa aa_uu.Ngaa baadal kii tarah

mai.n huu.N ik Khvaab magar jaagatii aa.Nkho.n kaa "Ameer"
aaj bhii log gavaa.N de na mujhe kal kii tarah ..

Dil mein kis darjaa bedilli hai abhi

dil me.n kis darjaa bedilii hai abhii


dil me.n kis darjaa bedilii hai abhii
har Khushii jaise ajanabii hai abhii

phir ba.Dhe hai.n qadam terii jaanib
tere Gam me.n bhii dil_kashii hai abhii

[jaanib=towards/in the direction of]

mai.n bhii tujh se bichha.D ke sar-gardaa.N
terii aa.Nkho.n me.n bhii namii hai abhii

[sar-gardaa.N=distressed]

mai.n ne maanaa bahut andheraa hai
phir bhii tho.Dii sii roshanii hai abhii


...........

un kii beruKhii me.n bhii iltefaat shaamil hai


un kii beruKhii me.n bhii iltefaat shaamil hai
aaj kal merii haalat dekhane ke qaabil hai

[iltefaat=kindness, courtesy]

qatl ho to meraa saa maut ho to merii sii
mere sog_vaaro.n me.n aaj meraa qaatil hai

[sog_vaaro.n=mourners]

muztarib hai.n mauje.n kyuu.N uTh rahe hai.n tuufaa.N kyuu.N
kyaa kisii safiine ko aarazuu-e-saahil hai

[muztarib=agitated; safiine=boats]

sirf rah_zan hii se kyuu.N "Ameer" shikvaa ho
manzilo.n kii raaho.n me.n raah_bar bhii shaamil hai

[rahazan=robber; raahabar=guide]..


..............