ye tabiyat hai to Khud aazaar ban jaayenge ham

ye tabiyat hai to Khud aazaar ban jaaye.nge ham


ye tabiyat hai to Khud aazaar ban jaaye.nge ham
chaaraagar roye.nge aur Gam_Khvaar ban jaaye.nge ham

ham sar-e-chaak-e-vafaa hai.n aur teraa dast-e-hunar
jo banaa degaa hame.n ai yaar ban jaaye.nge ham

kyaa Khabar thii ai nigaar-e-sher tere ishq me.n
dil_baraan-e-shahar ke dil_daar ban jaaye.nge ham

saKht jaan hai.n par hamaarii ustavaarii par na jaa
aise TuuTe.nge teraa iqaraar ban jaaye.nge ham

aur kuchh din baiThane do kuu-e-jaanaa.N me.n hame.n
raftaa raftaa saayaa-e-diivaar ban jaaye.nge ham

is qadar aasaa.N na hogii har kisii se dostii
aashnaa_ii me.n teraa mayaar ban jaaye.nge ham

miir-o-Gaalib kyaa ke ban paaye nahii.n faiz-o-firaaq
zam ye thaa ruumii-o-ataar ban jaaye.nge ham

dekhane me.n shaaKh-e-gul lagate hai.n lekin dekhanaa
dast-e-gul_chii.n ke liye talvaar ban jaaye.nge ham

ham chiraaGo.n ko to taariikii se la.Danaa hai 'Faraz'
gul hue par subah ke aasaar ban jaaye.nge ham

Yeh merii Gazalen ye merii nazmen

zaKhm ko phuul to sar sar ko sabaa kahate hai.n


zaKhm ko phuul to sar sar ko sabaa kahate hai.n
jaane kyaa daur hai kyaa log hai.n kyaa kahate hai.n

kyaa qayaamat hai ke jin ke liye ruk ruk ke chale
ab vahii log hame.n aabalaapaa kahate hai.n

ko_ii batalaao ke ik umr kaa bichha.Daa mahabuub
ittefaaqan kahii.n mil jaaye to kyaa kahate hai.n

ye bhii andaaz-e-suKhan hai ke jafaa ko terii
Gamzaa-o-ishvaa-o-andaaz-o-adaa kahate hai.n

jab talak duur hai tuu terii parastish kar le.n
ham jise chhuu na sake.n us ko Khudaa kahate hai.n

kyaa ta'ajjub hai ke ham ahl-e-tamannaa ko 'Faraaz'
vo jo maharuum-e-tamannaa hai.n buraa kahate hai.n..

............

ye aalam shauq kaa dekhaa na jaaye


ye aalam shauq kaa dekhaa na jaaye
vo but hai yaa Khudaa dekhaa na jaaye

ye kin nazaro.n se tum ne aaj dekhaa
ke teraa dekhanaa dekha naa jaaye

hameshaa ke liye mujh se bichha.D jaa
ye manzar baarahaa dekhaa na jaaye

Galat hai jo sunaa par aazamaa kar
tujhe ai baavafaa dekhaa na jaaye

ye maharuumii nahii.n paas-e-vafaa hai
ko_ii tere sivaa dekhaa na jaaye

yahii to aashnaa banate hai.n aaKhir
ko_ii naa_aashnaa dekhaa na jaaye

'Faraz' apane sivaa hai kaun teraa
tujhe tujh se judaa dekhaa na jaaye..

............

ye kyaa ke sab se bayaa.N dil kii haalate.n karanii


ye kyaa ke sab se bayaa.N dil kii haalate.n karanii
'Faraz' tujh ko na aa_ii.n muhabbate.n karanii

ye qurb kyaa hai ke tuu saamane hai aur hame.n
shumaar abhii se judaa_ii kii sa'ate.n karanii

ko_ii Khudaa ho ke patthar jise bhii ham chaahe.n
tamaam umr usii kii ibaadate.n karanii

sab apane apanee qariine se muntazir us ke
kisii ko shukr kisii ko shikaayate.n karanii

ham apane dil se hai.n majabuur aur logon ko
zaraa sii baat pe barpaa qayaamate.n karanii

mile.n jab un se to mubaham sii guftaguu karanaa
phir apane aap se sau-sau vazaahate.n karanii

ye log kaise magar dushmanii nibhaate.n hai.n
hamii.n ko raas na aa_ii.n muhabbate.n karanii

kabhii 'Faraz' naye mausamo.n me.n ro denaa
kabhii talaash puraanii raqaabate.n karanii
.......

ye merii Gazale.n ye merii nazme.n tamaam terii hikaayate.n hai.n


ye merii Gazale.n ye merii nazme.n tamaam terii hikaayate.n hai.n
ye tazkire.n terii lutf ke hai.n ye sher terii shikaayate.n hai.n
mai.n sab terii nazr kar rahaa huu.N ye un zamaano.n kii s'ate.n hai.n
jo zindagii ke naye safar me.n tujhe kisii roz yaad aaye.N
to ek ek harf jii uThegaa pahan ke anfaas kii qabaaye.N
udaas tanahaa_iiyo.n ke lamho.n me.n naach uThe.ngii ye apasaraaye.N

[tazkire.n=mention; s'ate.n=moments]
[anfaas=breaths; qabaaye.N=long coats]

mujhe terii dard ke alaavaa bhii aur dukh the, ye jaanataa huu.N
hazaar Gam the jo zindagii kii talaash me.n the, ye jaanataa huu.N
mujhe Khabar hai ki terii aa.Nchal me.n dard kii ret chhaanataa huu.N
magar har ek baar tujh ko chhuu kar ye ret rang-e-hinaa banii hai
ye zaKhm gul_zaar ban gaye hai.n ye aahe.n-sozaa.N ghaTaa banii hai
ye dard mauj-e-sabaa huaa hai ye aag dil kii sadaa banii hai

aur ab ye saarii mataa-e-hastii ye phuul ye zaKhm sab tere hai.n
ye dukh ke nauhe ye sukh ke naGme.n jo kal mere the vo ab tere hai.n
jo terii qurbat terii judaa_ii me.n kaT gaye roz-o-shab tere hai.n
vo teraa shaayar teraa muGannii vo jis kii baate.n ajiib sii thii
vo jis ke andaaz Khusro-vaanaa the aur adaaye.N Gariib sii thii.n
vo jis ke jiine kii Khvaahishe.n bhii Khud us ke apane nasiib sii thii.n

[mataa=things; qurbat=nearness]
[roz-o-shab=day and night; muGannii=singer]
[Khusro-vaanaa=king-like; Khvaahishe.n=desires]

na puuchh us kaa ki vo diivaanaa bahut dino.n kaa uja.D chukaa hai
vo kohakan to nahii.n thaa lekin ka.Dii chaTTaano.n se la.D chukaa hai
vo thak chukaa hai aur us kaa teshaa usii ke siine me.n ga.D chukaa hai

[kohakan=another name for Farhaad; teshaa=axe]

us ne kahaa sun

us ne kahaa sun


us ne kahaa sun
ahad nibhaane kii Khaatir mat aanaa
ahad nibhaanevaale aksar majabuurii yaa
mahajuurii kii thakan se lauTaa karate hai.n
tum jaao aur dariyaa dariyaa pyaas bujhaao
jin aa.Nkho.n me.n Duubo
jis dil me.n bhii utaro
merii talab aavaaz na degii
lekin jab merii chaahat aur merii Khvaahish kii lau
itanii tez aur itanii uu.Nchii ho jaaye
jab dil rode
tab lauT aanaa ..

.........

us ne sukuut-e-shab me.n bhii apanaa payaam rakh diyaa


us ne sukuut-e-shab me.n bhii apanaa payaam rakh diyaa
hijr kii raat baam par maah-e-tamaam rakh diyaa

aamad-e-dost kii naviid kuu-e-vafaa me.n aam thii
mai.n ne bhii ik chiraaG-saa dil sar-e-shaam rakh diyaa

dekho ye mere Khvaab the dekho ye mere zaKhm hai.n
mai.n ne to sab hisaab-e-jaa.N bar_sar-e-aam rakh diyaa

us ne nazar nazar me.n hii aise bhale suKhan kahe
mai.n ne to us ke paa.No.n me.n saaraa kalaam rakh diyaa

shiddat-e-tishnagii me.n bhii Gairat-e-maikashii rahii
us ne jo pher lii nazar mai.n ne bhii jaam rakh diya

aur 'Faraz' chaahiiye kitanii muhabbate.n tujhe
ke maao.N ne tere naam par bachcho.n ka naam rakh diyaa.

..........

wafaa ke bhes mein ko_ii raqiib-e-shahar bhii hai


wafaa ke bhes mein ko_ii raqiib-e-shahar bhii hai
hazar! ke shahar ke qaatil tabiib-e-shahar bhii hai

vahii sipaah-e-sitam Khemaazan hai chaaro.n taraf
jo mere baKht me.n thaa ab nasiib-e-shahar bhii hai

udhar kii aag idhar bhii pahu.Nch na jaaye kahii.n
havaa bhii tez hai jangal qariib-e-shahar bhii hai

ab us ke hijr me.n rote hai.n us ke ghaayal bhii
Khabar na thii ke vo zaalim habiib-e-shahar bhii hai

ye raaz naaraa-e-mansuur hii se ham pe Khulaa
ke chuub-e-mimbar-e-masjid saliib-e-shahar bhii hai

ka.Dii hai jang ke ab ke muqaabile pe 'Faraz'
amiir-e-shahar bhii hai aur khatiib-e-shahar bhii hai...

...........

vafaa ke Khvaab muhabbat kaa aasara le jaa


vafaa ke Khvaab muhabbat kaa aasara le jaa
agar chalaa hai to jo kuchh mujhe diyaa le jaa

maqaam-e-suud-o-ziyaa.N aa gayaa hai phir jaanaa.N
ye zaKhm mere sahii tiir to uThaa le jaa

yahii hai qismat-e-saharaa yahii karam teraa
ki buu.Nd buu.Nd ataa kar ghaTaa ghaTaa le jaa

Guruur-e-dost se itanaa bhii dil_shikastaa na ho
phir uTh ke saamane daaman-e-iltajaa le jaa

nadaamate.n ho.n to sar baar-e-dosh hotaa hai
'Faraz' jaa.N ke evaz aabaruu bachaa le jaa..

..........

vahashat-e-dil silaa-e-aabalaa_paa_ii le le


vahashat-e-dil silaa-e-aabalaa_paa_ii le le
mujh se yaa rab mere lafzo.n kii kamaa_ii le le

[vahashat-e-dil = terrified heart; silaa-e-aabalaa_paa_ii = result of wandering]

aql har baar dikhaatii thii jale haath apane
dil ne har baar kahaa aag paraa_ii le le

mai.n to us subah-e-daraKhshaa.N ko tavangar jaanuu.N
jo mere shahar se kashkol-e-gadaa_ii le le

[subah-e-daraKhshaa.N = luminous dawn; tavangar = rich]
[kashkol-e-gadaa_ii = darkness in alms]

tuu Ganii hai magar itanii hai.n sharaayat merii
ye mohabbat jo hame.n raas na aa_ii le le

[Ganii = wealthy; sharaayat = conditions (plural of shart)]

apane diivaan ko galiyo.n me liye phirataa huu.N
hai ko_ii jo hunar-e-zaKhm_numaa_ii le le

.......

us ko judaa hue bhii zamaanaa bahut huaa

us ko judaa hue bhii zamaanaa bahut huaa


us ko judaa hue bhii zamaanaa bahut huaa
ab kyaa kahe.n ye qissaa puraanaa bahut huaa

Dhalatii na thii kisii bhii jatan se shab-e-firaaq
ai marg-e-naagahaa.N teraa aanaa bahut huaa

ham Khuld se nikal to gaye hai.n par ai Khudaa
itane se vaaqaye kaa fasaanaa bahut huaa

ab ham hai.n aur saare zamaane kii dushmaanii
us se zaraa rabt ba.Dhaanaa bahut huaa

ab kyo.n na zindagii pe muhabbat ko vaar de.n
is aashiqii me.n jaan se jaanaa bahut huaa

ab tak to dil ka dil se taarruf na ho sakaa
maanaa ki us se milanaa milaanaa bahut huaa

kyaa kyaa na ham Kharaab hue hai.n magar ye dil
ai yaad-e-yaar teraa Thikaanaa bahut huaa

kahataa thaa naaseho.n se mere muu.Nh na aa_iio
phir kyaa thaa ek huu kaa bahaanaa bahut huaa

lo phir tere labo.n pe usii bevafaa kaa zikr
ahmad 'Faraz' tujh se kahaa naa bahut huaa



..............

tere hote hue mahafil me.n jalaate hai.n chiraaG


tere hote hue mahafil me.n jalaate hai.n chiraaG
log kyaa saadaa hai.n suuraj ko dikhaate hai.n chiraaG

apanii maharuumiyo.n pe sharmindaa hai.n
Khud nahii.n rakhate to auro.n ke bujhaate hai.n chiraaG

bastiyaa.N chaa.Nd sitaaro.n pe basaane vaale
kurraa-e-arz bujhaate jaate hai.n chiraaG

kyaa Khabar hai un ko ke daaman bhii bha.Dak uThate hai.n
jo zamaane kii havaao.n se bachaate hai.n chiraaG

aisii taariikiiyaa.N aa.Nkho.n me.n basii hai.n 'Faraz'
raat to raat ham din ko jalaate hai.n chiraaG..

............

terii baate.n hii sunaane aaye


terii baate.n hii sunaane aaye
dost bhii dil hii dukhaane aaye

phuul khilate hai.n to ham sochate hai.n
tere aane ke zamaane aaye

aisii kuchh chup sii lagii hai jaise
ham tujhe haal sunaane aaye

ishq tanhaa hai sar-e-manzil-e-Gam
kaun ye bojh uThaane aaye

ajanabii dost hame.n dekh ke ham
kuchh tujhe yaad dilaane aaye

dil Dha.Dakataa hai safar ke hangaam
kaash phir ko_ii bulaane aaye

ab to rone se bhii dil dukhataa hai
shaayad ab hosh Thikaane aaye

kyaa kahii.n phir ko_ii bastii uja.Dii
log kyuu.N jashn manaane aaye

so raho maut ke pahaluu me.n 'Faraz'
niind kis vaqt na jaane aaye

...........

tum bhi Khafaa ho log bhii beraham hai.n dosto


tum bhi Khafaa ho log bhii beraham hai.n dosto
ab ho chalaa yaqii.n ke bure ham hai.n dosto

kis ko hamaare haal se nisbat hai kyaa kare.n
aa.Nkhe.n to dushmano.n kii bhii pur_nam hai.n dosto

apane sivaa hamaare na hone kaa Gam kise
apanii talaash me.n to ham hii ham hai.n dosto

kuchh aaj shaam hii se hai dil bhii bujhaa bujhaa
kuchh shahar ke chiraaG bhii maddham hai.n dosto

is shahar-e-aarazuu se bhi baahar nikal chalo
ab dil kii raunaqe.n bhii ko_ii dam hai.n dosto

sab kuchh sahii 'Faraz' par itanaa zaruur hai
duniyaa me.n aise log bahut kam hai.n dosto...

............

tuu paas bhii ho to dil beqaraar apanaa hai


tuu paas bhii ho to dil beqaraar apanaa hai
ke ham ko teraa nahii.n intazaar apanaa hai

mile ko_ii bhii teraa zikr chhe.D dete hai.n
ke jaise saaraa jahaa.N raaz_daar apanaa hai

vo duur ho to bajaa tark-e-dostii kaa Khayaal
vo saamane ho to kab iKhtiyaar apanaa hai

zamaane bhar ke dukho.n ko lagaa liyaa dil se
is aasare pe ke ik Gam_gusaar apanaa hai

'Faraz' raahat-e-jaa.N bhii vahii hai kyaa kiije
vo jis ke haath se siinaa_fiGaar apanaa hai

........

Suna hai log usey Aankh bhar k dekhte hain

sunaa hai log use aa.Nkh bhar ke dekhate hai.n


sunaa hai log use aa.Nkh bhar ke dekhate hai.n
so us ke shahar me.n kuchh din Thahar ke dekhate hai.n

sunaa hai rabt hai us ko Kharaab haalo.n se
so apane aap ko barbaad karake dekhate hai.n

[rabt=closeness/relation]

sunaa hai dard kii gaahak hai chashm-e-naazuk us kii
so ham bhii us kii galii se guzar kar dekhate hai.n

[gaahak=customer]

sunaa hai us ko bhii hai sher-o-shaayarii se shagaf
so ham bhii mojaze apane hunar ke dekhate hai.n

[shagaf=passion]

sunaa hai bole to baato.n se phuul jha.Date hai.n
ye baat hai to chalo baat kar ke dekhate hai.n

sunaa hai raat use chaa.Nd takataa rahataa hai
sitaare baam-e-falak se utar kar dekhate hai.n

sunaa hai hashr hai.n us kii Gazaal sii aa.Nkhe.n
sunaa hai us ko hiran dasht bhar ke dekhate hai.n

sunaa hai din ko use titaliyaa.N sataatii hai.n
sunaa hai raat ko jugnuu Thahar ke dekhate hai.n

sunaa hai raat se ba.Dh kar hai.n kaakule.n us kii
sunaa hai shaam ko saaye guzar ke dekhate hai.n

sunaa hai us kii siyaah chashmagii qayaamat hai
so us ko surmaafarosh aa.Nkh bhar ke dekhate hai.n

sunaa hai us ke labo.n se gulaab jalate hai.n
so ham bahaar par ilzaam dhar ke dekhate hai.n

sunaa hai aa_iinaa tamasaal hai jabii.n us kaa
jo saadaa dil hai.n ban sa.Nvar ke dekhate hai.n

sunaa hai jab se hamaa_il hai.n us kii gardan me.n
mizaaj aur hii laal-o-gauhar ke dekhate hai.n

[hamaail=something to wear around the neck]

sunaa hai chashm-e-tasavvur se dasht-e-imkaan me.n
palang zaave us kii kamar ke dekhate hai.n

[zaave=angles]

sunaa hai us ke badan ke taraash aise hai.n
ke phuul apanii qabaaye.N katar ke dekhate hai.n

vo sarv-qad hai magar be-gul-e-muraad nahii.n
ke us shajar pe shaguufe samar ke dekhate hai.n

[sarv-qad=tall and graceful; shaguufe=bud; samar=fruit]

bas ek nigaah se luTataa hai qaafilaa dil kaa
so rah_ravaan-e-tamannaa bhii Dar ke dekhate hai.n

[rah_ravaa.N=travellers]

sunaa hai us ke shabistaan se muttasil hai bahisht
makiin udhar ke bhii jalve idhar ke dekhate hai.n

[shabistan=bedroom; muttasil=near; makiin=tenant]

ruke to gardishe.n us kaa tavaaf karatii hai.n
chale to us ko zamaane Thahar ke dekhate hai.n

kise nasiib ke be-pairahan use dekhe
kabhii kabhii dar-o-diivaar ghar ke dekhate hai.n

[be-pairahan=without clothes]

kahaaniyaa.N hii.n sahii sab mubaalaGe hii sahii
agar vo Khvaab hai taabiir kar ke dekhate hai.n

[mubaalaGe=beyond one's limits]

ab us ke shahar me.n Thahare.n ki kuuch kar jaaye.N
'Faraz' aao sitaare safar ke dekhate hain..

sholaa thaa jal-bujhaa hooN

sholaa thaa jal-bujhaa huu.N havaaye.n mujhe na do


sholaa thaa jal-bujhaa huu.N havaaye.n mujhe na do
mai.n kab kaa jaa chukaa huu.N sadaaye.n mujhe na do

jo zahar pii chukaa huu.N tumhii.n ne mujhe diyaa
ab tum to zindagii kii duaaye.n mujhe na do

aisaa kahii.n na ho ke palaTakar na aa sakuu.N
har baar duur jaa ke sadaaye.n mujhe na do

kab mujh ko aiteraaf-e-muhabbat na thaa 'Faraaz'
kab mai.n ne ye kahaa thaa sazaaye.n mujhe na do..

...........

ta.Dap uThuu.N bhii to zaalim terii duhaa_ii na duu.N


ta.Dap uThuu.N bhii to zaalim terii duhaa_ii na duu.N
mai.n zaKhm zaKhm huu.N phir bhii tujhe dikhaa_ii na duu.N

tere badan me.n dha.Dakane lagaa huu.N dil kii tarah
ye aur baat ke ab bhii tujhe sunaa_ii na duu.N

Khud apane aap ko parakhaa to ye nadaamat hai
ke ab kabhii use ilzaam-e-bevafaa_ii na duu.N

[nadaamat=regret/shame]

mujhe bhii Dhuu.NDh kabhii mahv-e-aa_iinaa_daarii
mai.n teraa aqs huu.N lekin tujhe dikhaa_ii na duu.N

[mahv=immersed in; aqs=reflection]....

qurbaton mein bhii judaai ke zamaane maaNge

qurbato.n me.n bhii judaa_ii ke zamaane maa.Nge


qurbato.n me.n bhii judaa_ii ke zamaane maa.Nge
dil vo bemehar ki rone ke bahaane maa.Nge

apanaa ye haal ke jii haar chuke luT bhii chuke
aur muhabbat vahii andaaz puraane maa.Nge

ham na hote to kisii aur ke charche hote
khalqat-e-shahar to kahane ko fasaane maa.Nge

dil kisii haal pe maane hii nahii.n jaan-e-'Faraz'
mil gaye tum bhii to kyaa aur na jaane maa.Nge...

...........

ranjish hii sahii dil hii dukhaane ke liye aa


ranjish hii sahii dil hii dukhaane ke liye aa
aa phir se mujhe chho.D ke jaane ke liye aa

pahale se maraasim na sahii phir bhii kabhii to
rasm-o-rahe duniyaa hii niibhaane ke liye aa

kis kis ko bataaye.nge judaa_ii kaa sabab ham
tuu mujh se Khafaa hai to zamaane ke liye aa

kuchh to mere pindaar-e-muhabbat ka bharam rakh
tuu bhii to kabhii mujh ko manaane ke liye aa

ek umr se huu.N lazzat-e-giriyaa se bhii maharuum
ai raahat-e-jaa.N mujh ko rulaane ke liye aa

ab tak dil-e-Khush_faham ko tujh se hai.n ummiide.n
ye aaKhirii shamme.n bhii bujhaane ke liye aa

The following ashaar are by Talib Baghpati but Mehdi Hassan
always sings them as part of this Gazal.
maanaa ki muhabbat kaa chhipaanaa hai muhabbat
chupake se kisii roz jataane ke liye aa

jaise tujhe aate hai.n na aane ke bahaane
aise hii kisii roz na jaane ke liye aa..

...........

saaqiyaa ik nazar jaam se pahale pahale


saaqiyaa ik nazar jaam se pahale pahale
ham ko jaanaa hai kahii.n shaam se pahale pahale

Khush huaa ai dil ke muhabbat to nibhaa dii tuune
log uja.D jaate hai.n anjaam se pahale pahale

ab tere zikr pe ham baat badal dete hai.n
kitanii raGabat thii tere naam se pahale pahale

saamane umr pa.Dii hai shab-e-tanhaa_ii kii
vo mujhe chho.D gayaa shaam se pahale pahale

......

sab log liye sang-e-malaamat nikal aaye


sab log liye sang-e-malaamat nikal aaye
kis shahar me.n ham ahal-e-muhabbat nikal aaye

ab dil kii tamannaa hai to ai kaash yahii ho
aa.Nsuu kii jagah aa.Nkh se hasarat nikal aaye

har ghar kaa diyaa gul na karo tum ke na jaane
kis baam se Khurashiid-e-qayaamat nikal aaye

jo dar_paa-e-pindaar hai.n un qatl_gaho.n se
jaa.N deke bhii samajho ke salaamat nikal aaye

ai ham_nafaso.n kuchh to kaho ahad-e-sitam kii
ik harf se mumkin hai hikaayat nikal aaye

yaaro mujhe masaluub karo tum ke mere baad
shaayad ke tumhaaraa qad-o-qaamat nikal aaye..


.............

sakuut-e-shaam-e-Khizaa.N hai qariib aa jaao


sakuut-e-shaam-e-Khizaa.N hai qariib aa jaao
ba.Daa udaas samaa.N hai qariib aa jaao

na tum ko Khud pe bharosaa na ham ko zom-e-vafaa
na aitabaar-e-jahaa.N hai qariib aa jaao

raah-e-talab me.n kisii ko dhyaan nahii.n
hujuum-e-ham_safaraa.N hai qariib aa jaao

jo dasht-e-ishq me.n bichha.De.n vo umr bhar na mile
yahaa.N yahaa.N dhuaa.N hii dhuaa.N hai qariib aa jaao

ye aa.Ndhiyaa.N hai.n to shahar-e-vafaa kii Khair nahii.n
zamaanaa Khaak_fashaa.N hai qariib aa jaao

faaqih-e-shahar kii majalis nahii.n ke duur raho
ye bazm-e-piir-e-maGaa.N hai qariib aa jaao

'Faraz' duur ke suuraj Garuub samajhe gaye
ye daur-e-kam_nazaaraa hai qarib aa jaao

............

muttafaavaten hain mere Khudaa ki ye tuu nahiin ko_ii aur hai

muttafaavate.n hai.n mere Khudaa ki ye tuu nahii.n ko_ii aur hai


muttafaavate.n hai.n mere Khudaa ki ye tuu nahii.n ko_ii aur hai
ki tuu aasamaan pe ho to ho pisar-e-zamii.n ko_ii aur hai

[pisar=son]

vo jo raaste the vafaa ke the ye jo manzile.n hai.n sazaa kii hai.n
meraa ham_safar ko_ii aur thaa meraa ham_nashii.n ko_ii aur hai

mere jism-o-jaa.N me.n tere sivaa aur ko_ii bhii duusaraa
mujhe phir bhii lagataa hai is tarah ki kahii.n kahii.n ko_ii aur hai

mai.n asiir apane gazaal kaa mai.n faqiir dasht-e-visaal kaa
jo hiran ko baa.Ndh ke le gayaa vo subuk_tagii.n ko_ii aur hai

[asiir=prisoner; gazaal=deer; subuk-tagii.n=name of emperor]..

............

payaam aaye hai.n us yaar-e-bevafaa ke mujhe


payaam aaye hai.n us yaar-e-bevafaa ke mujhe
jise qaraar na aayaa kahii.n bhulaa ke mujhe

nashe se kahuu.N to nahii.n yaad-e-yaar kaa aalam
ke le u.Daa hai ko_ii dosh par havaa ke mujhe

judaa_iyaa.N ho.n to aisii ki umr bhar na mile
fareb to do zaraa sil_sile ba.Daa ke mujhe

mai.n Khud ko bhuul chukaa tha magar jahaa.N vaale
udaas chho.D gaye aa_iinaa dikhaake mujhe...

............

pech rakhate ho bahut saaj-o-dastaar ke biich


pech rakhate ho bahut saaj-o-dastaar ke biich
mai.n ne sar girate hue dekhe hai.n baazaar ke biich

[pech = anger; saaj-o-dastaar = turban]

baaG_baano.n ko ajab ranj se takate hai.n gulaab
gul_farosh aaj bahut jamaa hai.n gul_zaar ke biich

[ranj = sorrow; gul_farosh = flower sellers]

kaj adaao.n kii inaayat hai ki ham se ushshaaq
kabhii diivaar ke piichhe kabhii diivaar ke biich

[kaj - crooked; ushshaaq = lovers]

tum ho naa_Khush to yahaa.N kaun hai Khush phir bhi 'Faraz'
log rahate hai.n isii shahar-e-dil-e-aazaar ke biich

..........

muntazir kab se tahayyur hai terii taqariir kaa


muntazir kab se tahayyur hai terii taqariir kaa
baat kar tujh par gumaa.N hone lagaa tasviir kaa

[muntazir=waiting; tahayyur=amazement; taqariir=speech]

raat kyaa soye ki baaqii umr kii niind u.D ga_ii
Khvaab kyaa dekhaa ki dha.Dakaa lag gayaa taabiir kaa

[taabiir=reality]

jaane tuu kis aalam me.n bichha.Daa hai ki tere baGair
aaj tak har lafz fariyaadii merii tahariir kaa

[tahariir=writing]

jis tarah baadal kaa saayaa pyaas bha.Dakaataa rahe
mai.n ne vo aalam bhii dekhaa hai terii tasviir kaa

kis tarah paayaa tujhe phir kis tarah khoyaa tujhe
mujh saa munkir bhii to qaa_il ho gayaa taqadiir kaa

[munkir=atheist; qaa_il honaa=to be a fan/follower]

ishq me.n sar pho.Danaa bhii kyaa ke ye be-meher log
juu-e-Khuu.N ko naam dete hai.n juu-e-shiir kaa

jis ko bhii chaahaa use shiddat se chaahaa hai 'Faraz'
si_-silaa TuuTaa nahii.n dard kii zanjiir kaa ..

................

phir usii raah_guzar par shaayad


phir usii raah_guzar par shaayad
ham kabhii mil sake.n magar shaayad

jaan pahachaan se kyaa hogaa
phir bhi ai dost Gaur kar shaayad

muntazir jin ke ham rahe tum ho
mil gaye aur ham_safar shaayad

jo bhii bichha.De hai.n kab mile hai.n 'Faraz'
phir bhii tuu intazaar kar shaayad...

Main to aavaaraa shayar hoon meri kya vaqa'at

mai.n to aavaaraa shaayar huu.N merii kyaa vaqa'at


mai.n to aavaaraa shaayar huu.N merii kyaa vaqa'at
ek do giit pareshaan se gaa letaa huu.N

gahe gahe kisii naakaam sharaabii kii tarah
ek do zahar ke saaGar bhii cha.Dhaa letaa huu.N

tuu ke ik vaadii-e-gul_rang kii shah_zaadii hai
ek bekaar se insaa.N ke liye vaqf na ho

tere Khvaabo.n ke jaziiro.n me.n ba.Dii raunaq hai
ek anjaan se tuufaa.N ke liye vaqf na ho

......

Khamosh ho kyo.n daad-e-jafaa kyuu.N nahii.n dete


Khamosh ho kyo.n daad-e-jafaa kyuu.N nahii.n dete
bismil ho to qaatil ko duaa kyuu.N nahii.n dete

vahashat kaa sabab ruuzan-e-zindaa.N to nahii.n hai
mahar-o-maah-o-anjum ko bujhaa kyuu.N nahii.n dete

ik ye bhii to andaaz-e-ilaaj-e-Gam-e-jaa.N hai
ai chaaraagaro dard ba.Dhaa kyuu.N nahii.n dete

munsif ho agar tum to kab insaaf karoge
mujarim hai agar ham to sazaa kyuu.N nahii.n dete

rahazan ho to haazir hai mataa-e-dil-o-jaa.N bhii
rahabar ho to manzil kaa pataa kyuu.N nahii.n dete

kyaa biit ga_ii ab ke 'Faraz' ahal-e-chaman par
yaaraan-e-qafas mujh ko sadaa kyuu.N nahii.n dete..

.............

Khvaab marate nahii.n


Khvaab marate nahii.n
Khvaab dil hai.n na aa.Nkhe.n na saa.Nse.n ke jo
rezaa-rezaa hue to bikhar jaaye.nge
jism kii maut se ye bhii mar jaaye.nge

Khvaab marate nahii.n
Khvaab to raushanii hai.n, navaa hai.n, havaa hai.n
jo kaale pahaa.Do.n se rukate nahii.n
zulm ke dozaKho.n se bhii phukate nahii.n
raushanii aur navaa aur havaa ke aalam
maqtalo.n me.n pahu.Nch kar bhii jhukate nahii.n

Khvaab to harf hai.n
Khvaab to nuur hai.n
Khvaab to suqraat hai.n
Khvaab mansuur hai.n
....


kuchh na kisii se bole.nge


kuchh na kisii se bole.nge
tanhaa_ii me.n ro le.nge

ham berahabaro.n kaa kyaa
saath kisii ke ho le.nge

[berahabaro.n=pathless travellers]

Khud to hue rusavaa lekin
tere bhed na khole.nge

jiivan zahar bharaa saaGar
kab tak amrit ghole.nge

niind to kyaa aayegii 'Faraz'
maut aa_ii to so le.nge


............

kyaa ruKhsat-e-yaar kii gha.Dii thii


kyaa ruKhsat-e-yaar kii gha.Dii thii
ha.Nsatii hu_ii raat ro pa.Dii thii

ham Khud hii hue tabaah varnaa
duniyaa ko hamaarii kyaa pa.Dii thii

ye zaKhm hai.n un dino.n kii yaade.n
jab aap se dostii ba.Dii thii

jaate to kidhar ko tere vahashii
zanjiir-e-junuu.N ka.Dii pa.Dii thii

Gam the ki 'Faraz' aa.Ndhiyaa.N thii
dil thaa ki 'Faraz' pankhud.ii thii

Kathin hai raah guzar thori duur sath chalo

kaThin hai raah_guzar tho.Dii duur saath chalo


kaThin hai raah_guzar tho.Dii duur saath chalo
bahut ba.Daa hai safar tho.Dii duur saath chaalo

tamaam umr kahaa.N ko_ii saath detaa hai
mai.n jaanataa huu.N magar tho.Dii duur saath chalo

nashe me.n chuur huu.N mai.n bhii tumhe.n bhii hosh nahii.n
ba.Daa mazaa ho agar tho.Dii duur saath chalo

ye ek shab kii mulaaqaat bhii Ganimat hai
kise hai kal kii Khabar tho.Dii duur saath chalo

abhii to jaag rahe hai.n chiraaG raaho.n ke
abhii hai duur sahar tho.Dii duur saath chalo

tavaaf-e-manzil-e-jaanaa.N hame.n bhii karanaa hai
'Faraz' tum bhii agar tho.Dii duur saath chalo



............

jis simt bhii dekhuu.N nazar aataa hai ke tum ho


jis simt bhii dekhuu.N nazar aataa hai ke tum ho
ai jaan-e-jahaa.N ye ko_ii tum saa hai ke tum ho

ye Khvaab hai Khushbuu hai ke jho.nkaa hai ke pal hai
ye dhundh hai baadal hai ke saayaa hai ke tum ho

is diid kii sa_aat me.n ka_ii rang hai.n larazaa.N
mai.n huu.N ke ko_ii aur hai duniyaa hai ke tum ho

dekho ye kisii aur kii aa.Nkhe.n hai.n ke merii
dekhuu.N ye kisii aur kaa cheharaa hai ke tum ho

ye umr-e-gurezaa.N kahii.n Thahare to ye jaanuu.N
har saa.Ns me.n mujh ko ye lagataa hai ke tum ho

har bazm me.n mauzuu-e-suKhan dil zad_gaa.N kaa
ab kaun hai shiirii.n hai ke lailaa hai ke tum ho

ik dard kaa phailaa huaa saharaa hai ke mai.n huu.N
ik mauj me.n aayaa huaa dariya hai ke tum ho

vo vaqt na aaye ke dil-e-zaar bhii soche
is shahar me.n tanhaa ko_ii ham saa hai ke tum ho

aabaad ham aashuftaa saro.n se nahii.n maqtal
ye rasm abhii shahar me.n zindaa hai ke tum ho

ai jaan-e-'Faraz' itanii bhii taufiiq kise thii
ham ko Gam-e-hastii bhii gavaaraa hai ke tum ho ..

..........

juz tere ko_ii bhii din raat na jaane mere


juz tere ko_ii bhii din raat na jaane mere
tuu kahaa.N hai magar ai dost puraane mere

[juz=except]

tuu bhii Khushbuu hai magar meraa tajassus bekaar
barq-e-aavaaraa kii maanind Thikhaane mere

shamaa ki lau thii ke vo tuu thaa magar hijr kii raat
der tak rotaa rahaa ko_ii sirhaane mere

[sirhaane=bed-side]

Khalq kii beKhabarii hai ke merii rusavaa_ii
log mujh ko hii sunaate hai.n fasaane mere

luT ke bhii Khush huu.N ke ashko.n se bharaa hai daaman
dekh Gaarat_gare dil ye bhii Khazaane mere

aaj ik aur baras biit gayaa us ke baGair
jis ke hote hue hote the zamaane mere

kaash tuu bhii merii aavaaz sunataa ho
phir pukaare hai tujhe dil kii sadaa ne mere

kaash tuu bhii kabhii aajaaye masiihaa_ii ko
log aate hai.n bahut dil ko dukhaane mere

kaash auro.n kii tarah mai.n bhii kah sakataa
baat sun lii hai merii aaj Khudaa ne mere

tuu hai kis haal me.n ai zuud_faraamosh mere
mujh ko to chhiin liyaa ahad-e-vafaa ne mere

chaaraagar yuu.N to bahut hai.n magar ai jaan-e-'Faraz'
juz tere aur ko_ii Gam na jaane mere
.........

kahaa thaa kis ne ke ahad-e-vafaa karo us se


kahaa thaa kis ne ke ahad-e-vafaa karo us se
jo yuu.N kiyaa hai to phir kyuu.N gilaa karo us se

ye ahl-e-baz tunak hausalaa sahii phir bhii
zaraa fasaanaa-e-dil ibtidaa karo us se

ye kyaa ke tum hii Gam-e-hijr ke fasaane kaho
kabhii to us ke bahaane sunaa karo us se

nasiib phir ko_ii taqriib-e-qarb ho ke na ho
jo dil me.n ho.n vahii baate.n kiyaa karo us se

'Faraz' tark-e-ta'alluq to Khair kyaa hogaa
yahii bahut hai ke kam kam milaa karo us se..

...........

karuu.N na yaad agar kis tarah bhulaa_uu.N use


karuu.N na yaad agar kis tarah bhulaa_uu.N use
Gazal bahaanaa karuu.N aur gun_gunaa_uu.N use

vo Khaar-Khaar hai shaaKh-e-gulaab kii maanind
mai.n zaKhm-zaKhm huu.N phir bhii gale lagaa_uu.N use

[Khaar=thorn]

ye log tazakare karate hai.n apane logo.n se
mai.n kaise baat karuu.N aur kahaa.N se laa_uu.N use

[tazakare=narration/descrption]

magar vo zuud_faraamosh zuud ranj bhii hai
ke ruuTh jaaye agar yaad kuchh dilaa_uu.N use

vahii jo daulat-e-dil hai vahii jo raahat-e-jaa.N
tumhaarii baat pe ai naasiho ga.Nvaa_uu.N use

jo ham_safar sar-e-manzil bichha.D rahaa hai 'Faraz'
ajab nahii.n ki agar yaad bhii na aa_uu.N use..

............

Iss se pehle k bewafa ho jaayen

is se pahale ke bevafaa ho jaaye.n


is se pahale ke bevafaa ho jaaye.n
kyo.n na ai dost ham judaa ho jaaye.n

tuu bhii hiire se ban gayaa patthar
ham bhii kal kyaa se kyaa ho jaaye.n

ham bhii majabuuriyo.n kaa uzr kare.n
aur kahii.n aur mubtalaa ho jaaye.n

ishq bhii khel hai nasiibo.n kaa
Khaak ho jaaye.n kimiyaa ho jaaye.n

ab ke gar tuu mile to ham tujh se
aise lipaTe.n terii qabaa ho jaaye.n

bandagii ham ne chho.D dii hai 'Faraz'
kyaa kare.n log jab Khudaa ho jaaye.n


................

hu_ii hai shaam to aa.Nkho.n me.n bas gayaa phir tuu


hu_ii hai shaam to aa.Nkho.n me.n bas gayaa phir tuu
kahaa.N gayaa hai mere shahar ke musaafir tuu

bahut udaas hai ik shaKhs tere jaane se
jo ho sake to chalaa aa usii kii Khaatir tuu

[shaKhs = individual/person]

merii misaal ki ik naKhl-e-Khushk-e-saharaa huu.N
teraa Khayaal ki shaaKh-e-chaman kaa taa_ir tuu

[misaal = example; taa_ir = bird]
[naKhl-e-Khushk-e-saharaa = dry tree in the wilderness]

mai.n jaanataa huu.N ke duniyaa tujhe badal degii
mai.n maanataa huu.N ke aisaa nahii.n bazaahir tuu

[bazaahir = appear to be]

ha.Nsii Khushii se bichha.D jaa agar bichha.Danaa hai
ye har maqaam pe kyaa sochataa hai aaKhir tuu

'Faraz' tuune use mushkilo.n me.n Daal diyaa
zamaanaa saahib-e-zar aur sirf shaayar tuu

[saahib-e-zar = wealthy]..

...........

inhii.n Khush_gumaaniyo.n me.n kahii.n jaa.N se bhii na jaao


inhii.n Khush_gumaaniyo.n me.n kahii.n jaa.N se bhii na jaao
vo jo chaaraagar nahii.n hai use zaKhm kyuu.N dhikhaao

ye udaasiyo.n ke mausam kahii.n raayegaa.N na jaaye.N
kisii zaKhm ko kuredo kisii dard ko jagaao

vo kahaaniyaa.N adhuurii jo na ho sake.ngii puurii
unhe.n mai.n bhii kyuu.N sunaa_uu.N unhe.n tum bhii kyuu.N sunaao

mere ham_safar puraane mere ab bhii muntazir hai.n
tumhe.n saath chho.Danaa hai to abhii se chho.D jaao

ye judaa_iyo.n ke raste ba.Dii duur tak gaye hai.n
jo gayaa vo phir na lauTaa merii baat maan jaao

kisii bevafaa kii Khaatir ye junuu.N 'Faraz' kab tak
jo tumhe.n bhulaa chukaa hai use tum bhii bhuul jaao
......

is daur-e-bejunuu.N kii kahaanii ko_ii likho


is daur-e-bejunuu.N kii kahaanii ko_ii likho
jismo.n ko barf Khuun ko paanii ko_ii likho

ko_ii kaho ki haath qalam kis tarah hue
kyuu.N ruk ga_ii qalam kii ravaanii ko_ii likho

kyo.n ahal-e-shauq sar-va-garebaa.N hai.n dosto
kyo.n Khuu.N-ba-dil hai ahad-e-javaanii ko_ii likho

kyo.n surmaa-dar-guluu hai har ek taayar-e-suKhan
kyo.n gul_sitaa.N qafas kaa hai saanii ko_ii likho

haa.N taazaa saaneho.n kaa kare kaun intazaar
haa.N dil kii vaaradaat puraanii ko_ii likho..

..............

is qadar musal_sal thii.n shiddate.n judaa_ii kii


is qadar musal_sal thii.n shiddate.n judaa_ii kii
aaj pahalii baar mai.n ne us bevafaa_ii kii

[musal_sal=continuous; shiddat=severity]

varanaa ab talak yuu.N thaa Khvaahisho.n kii baarish me.n
yaa to TuuT kar royaa yaa Gazal_saraa_ii kii

[Khvaahish=desire/wish]

taj diyaa thaa kal jin ko ham ne terii chaahat me.n
aaj un se majabuuran taazaa aashanaa_ii kii

[taj denaa=to abandon; aashanaa_ii=love/form relationships]

ho chalaa thaa jab mujh ko iKhtilaaf apane se
tuune kis gha.Dii zaalim merii ham_navaa_ii kii

[iKhtilaaf=difference of opinion; ham-navaa_ii=friendship]

tanz-o-taanaa-o-tohamat sab hunar hai.n naaseh ke
aap se ko_ii puuchhe ham ne kyaa buraa_ii kii

[tanz=satire; taanaa=taunt; tohamat=allegation; naaseh=preacher]

phir qafas me.n shor uTThaa qaidiyo.n kaa aur sayyaad
dekhanaa u.Daa degaa phir Khabar rihaa_ii kii

[qafas=cage/prison; sayyaad=hunter]..

.............

Hawa k zor se pindaar-e-baam-o-daar bhi gaya

'Faraz' ab ko_ii saudaa ko_ii junuu.N bhii nahii.n


'Faraz' ab ko_ii saudaa ko_ii junuu.N bhii nahii.n
magar qaraar se din kaT rahe ho.n yuu.N bhii nahii.n

lab-o-dahan bhii milaa guftaguu kaa fan bhii milaa
magar jo dil pe guzaratii hai kah sakuu.N bhii nahii.n

[lab = lips; dahan = mouth; guftaguu = conversation]
[fan = art/skill]

merii zubaa.N kii luknat se bad_gumaa.N na ho
jo tuu kahe to tujhe umr bhar miluu.N bhii nahii.n

[luknat = stammering; bad_gumaa.N = suspicious]

'Faraz' jaise ko_ii diyaa turbat-e-havaa chaahe hai
tuu paas aaye to mumkin hai mai.n rahuu.N bhii nahii.n

[turbat = grave/tomb]

.....

dukh fasaanaa nahii.n ke tujh se kahe.n


dukh fasaanaa nahii.n ke tujh se kahe.n
dil bhii maanaa nahii.n ke tujh se kahe.n

aaj tak apanii bekalii kaa sabab
Khud bhii jaanaa nahii.n ke tujh se kahe.n

ek tuu harf_aashnaa thaa magar
ab zamaanaa nahii.n ke tujh se kahe.n

be-tarah dil hai aur tujh se
dostaanaa nahii.n ke tujh se kahe.n

ai Khudaa dard-e-dil hai baKhshish-e-dost
aab-o-daanaa nahii.n ke tujh se kahe.n

.............

dost ban kar bhii nahii.n saath nibhaanevaalaa


dost ban kar bhii nahii.n saath nibhaanevaalaa
vahii andaaz hai zaalim kaa zamaanevaalaa

ab ise log samajhate hai.n giraftaar meraa
saKht nadiim hai mujhe daam me.n laanevaalaa

kyaa kahe.n kitane maraasim the hamaare is se
vo jo ik shaKhs hai muu.Nh pher ke jaanevaalaa

tere hote hue aa jaatii thii saarii duniyaa
aaj tanhaa huu.N to ko_ii nahii.n aanevaalaa

muntazir kis kaa huu.N TuuTii hu_ii dahaliiz pe mai.n
kaun aayegaa yahaa.N kaun hai aanevaalaa

mai.n ne dekhaa hai bahaaro.n me.n chaman ko jalate
hai ko_ii Khvaab kii taabiir bataanevaalaa

kyaa Khabar thii jo merii jaan me.n ghulaa hai itanaa
hai vahii mujh ko sar-e-daar bhii laane vaalaa

tum taqalluf ko bhii iKhalaas samajhate ho 'Faraz'
dost hotaa nahii.n har haath milaanevaalaa ...


...............

har tamaashaa_ii faqat saahil se manzar dekhataa


har tamaashaa_ii faqat saahil se manzar dekhataa
kaun dariyaa ko ulaTataa kaun gauhar dekhataa

[tamaashaa_ii=spectator; faqat=merely; saahil=river side]
[ma.nzar=spectacle/show/view; gauhar=pearl]

vo to duniyaa ko merii diivaangii Khush aa ga_ii
tere haatho.n me.n vagarnaa pahalaa patthar dekhataa

[vagarnaa=otherwise]

aa.Nkh me.n aa.Nsuu ja.De the par sadaa tujh ko na dii
is tavaqqo par ki shaayad tuu palaT kar dekhataa

[sadaa=call; tavaqqo=hope]

merii qismat kii lakiire.n mere haatho.n me.n na thii.n
tere maathe par ko_ii meraa muqaddar dekhataa

[qismat=fate; lakiire.n=lines; maathe=forehead]
[muqaddar= destiny/fate]

zindagii phailii hu_ii thii shaam-e-hijraa.N kii tarah
kis ko itanaa hausalaa thaa kaun jii kar dekhataa

[shaam-e-hijraa.N=evening of separation; hausalaa=strength]

Duubane vaalaa thaa aur saahil pe cheharo.n kaa hujuum
pal kii mohalat thii mai.n kis ko aa.Nkh bhar ke dekhataa

[hujuum=crowd; mohalat=(free) time]

tuu bhii dil ko ik lahuu kii buu.Nd samajhaa hai 'Faraz'
aa.Nkh gar hotii to qatre me.n samandar dekhataa

[lahuu=blood; qatre=drops; samandar=ocean].

...........

havaa ke zor se pindaar-e-baam-o-daar bhii gayaa


havaa ke zor se pindaar-e-baam-o-daar bhii gayaa
chiraaG ko jo bachaate the un kaa ghar bhii gayaa

pukaarate rahe mahafuuz kishtiyo.n vaale
mai.n Duubataa huaa dariyaa ke paar utar bhii gayaa

ab ehatiyaat kii diivaar kyaa uThaate ho
jo chor dil me.n chhupaa thaa vo kaam kar bhii gayaa

mai.n chup rahaa ki is me.n thii aafiyat jaa.N kii
ko_ii to merii tarah thaa jo daar par bhii gayaa

sulagate sochate viiraa.N mausamo.n kii tarah
ka.Daa thaa ahad-e-javaanii magar guzar bhii gayaa

jise bhulaa na sakaa us ko yaad kyaa rakhataa
jo naam dil me.n rahaa zehan se utar bhii gayaa

phaTii-phaTii hu_ii aa.Nkho.n se yuu.N na dekh mujhe
tujhe talaash hai jis kii vo shaKhs mar bhii gayaa

magar falak kii adaavat usii ke ghar se na thii
jahaa.N 'Faraz' na thaa sail-e-Gam udhar bhii gayaa..

barason ke baad dekhaa ik shaKhs dil rubaa saa

badan me.n aag sii cheharaa gulaab jaisaaa hai


badan me.n aag sii cheharaa gulaab jaisaaa hai
ke zahar-e-Gam kaa nashaa bhii sharaab jaisaa hai

kahaa.N vo qurb ke ab to ye haal hai jaise
tere firaaq kaa aalam bhii Khvaab jaisaa hai

magar kabhii ko_ii dekhe ko_ii pa.Dhe to sahii
dil aa_iinaa hai to cheharaa kitaab jaisaa hai

vo saamane hai magar tishnagii nahii.n jaatii
ye kyaa sitam hai ke dariyaa saraab jaisaa hai

[tishnagii=thirst, saraab=illusion/mirage ]

'Faraz' sang-e-malaamat se zaKhm zaKhm sahii
hame.n aziiz hai Khaanaa_Kharaab jaisaa hai.

..........

baraso.n ke baad dekhaa ik shaKhs dil_rubaa saa


baraso.n ke baad dekhaa ik shaKhs dil_rubaa saa
ab zahan me.n nahii.n hai par naam thaa bhalaa saa

abaruu khi.nche khi.nche se aa.Nkhe.n jhukii jhukii sii
baate.n rukii rukii sii lahajaa thakaa thakaa saa

alfaaz the ke jugnuu aavaaz ke safar me.n
ban jaaye jangalo.n me.n jis tarah raastaa saa

Khvaabo.n me.n Khvaab us ke yaado.n me.n yaad us kii
niindo.n me.n ghul gayaa ho jaise ke rat_jagaa saa

pahale bhii log aaye kitane hii zindagii me.n
vo har tarah se lekin auro.n se thaa judaa saa

agalii muhabbato.n ne vo naa_muraadiyaa.N dii.n
taazaa rafaaqato.n se dil thaa Daraa Daraa saa

kuchh ye ke muddato.n se ham bhii nahii.n the roye
kuchh zahar me.n bujhaa thaa ahabaab kaa dilaasaa

phir yuu.N huaa ke saavan aa.Nkho.n me.n aa base the
phir yuu.N huaa ke jaise dil bhii thaa aabalaa saa

ab sach kahe.n to yaaro ham ko Khabar nahii.n thii
ban jaayegaa qayaamat ik vaaqi_aa zaraa saa

tevar the beruKhii ke andaaz dostii ke
vo ajanabii thaa lekin lagataa thaa aashnaa saa

ham dasht the ke dariyaa ham zahar the ke amrit
naahaq thaa zo.Num ham ko jab vo nahii.n thaa pyaasaa

ham ne bhii us ko dekhaa kal shaam ittefaaqan
apanaa bhii haal hai ab logo 'Faraz' kaa saa ...


...........

beniyaaz-e-Gam-e-paimaan-e-vafaa ho jaanaa


beniyaaz-e-Gam-e-paimaan-e-vafaa ho jaanaa
tum bhii auro.n kii tarah mujh se judaa ho jaanaa

mai.n bhii palako.n pe sajaa luu.Ngaa lahuu kii buu.Nde.n
tum bhii paabastaa-e-zanjiir-e-hiinaa ho jaanaa

Khalq kii sang_zanii merii Khataao.n kaa silaa
tum to maasuum ho tum duur zaraa ho jaanaa

ab mere vaaste tariyaq hai ilhaad kaa zahar
tum kisii aur pujaarii ke Khudaa ho jaanaa

...............

chhe.De mai.n ne kabhii lab-o-ruKhsaar ke qisse


chhe.De mai.n ne kabhii lab-o-ruKhsaar ke qisse
gahe gul-o-bul_bul kii hikaayat ko nikhaaraa
gahe kisii shahazaade ke afsaane sunaaye
gahe kyaa duniyaa-e-paristaa.N kaa nazaaraa
mai.n khoyaa rahaa jin-o-malaik ke jahaa.N me.n
har lahajaa agarche mujhe aadam ne pukaaraa

baraso.n yuu.N hii dil_jamii-e-aurang kii Khaatir
sau phuul khilaaye kabhii sau zaKhm Khariide
mai.n likhataa rahaa hijv baGaavat manshuu.n kii
mai.n pa.Dhataa rahaa qasr_nashiino.n ke qasiide
ubharaa bhii agar dil me.n ko_ii jazabaa-e-sar_kash
is Khauf se chup thaa ke ko_ii ho.nTh na sii de

lekin ye tilismaat bhii taa der na rah paaye
aaKhir mai-o-miinaa-o-Daf-o-chang bhii TuutTe
yuu.N dast-o-garebaa.N huaa insaan-o-Khudaaband
nakhachiir to ta.Dape qafas-e-rang bhii TuuTe
is kashmakash-e-zarraa-o-anjum kii fizaa me.n
kash_kol to kyaa afsar-o-aurang bhii TuuTe

mai.n dekh rahaa thaa mere yaaro.n ne ba.Dhakar
qaatil ko pukaaraa kabhii maqtal ko sadaa dii
gahe rasn-o-daar ke aaGosh me.n jhuule
gahe haram-o-dair kii buniyaad hilaa dii
jis aag se bhar_puur thaa maahaul kaa siinaa
vo aag mere lauh-o-qalam ko bhii pilaa dii

aur aaj shikastaa huaa har tauq-e-talaa_ii
ab fan meraa darbaar kii jagiir nahii.n hai
ab meraa hunar hai mere jamahuur kii daulat
ab meraa junuu.N kaif-e-taaziir nahii.n hai
ab dil pe jo guzaregii be-Tok kahuu.Ngaa
ab mere qalam mai.n ko_ii zanjiir nahii.n hai


..........
dil bhii bujhaa ho shaam kii parachhaa_iyaa.N bhii ho.n


dil bhii bujhaa ho shaam kii parachhaa_iyaa.N bhii ho.n
mar jaa_iye jo aise me.n tanhaa_iyaa.N bhii ho.n

aa.Nkho.n kii surKh lahar hai mauj-e-suparadagii
ye kyaa zaruur hai ke ab anga.Daa_iyaa.N bhii ho.n

har husn-e-saadaa lau na dil me.n utar sakaa
kuchh to mizaaj-e-yaar me.n geharaa_iyaa.N bhii ho.n

duniyaa ke tazakire to tabiyat hii le bujhe
baat us kii ho to phir suKhan aaraa_iyaa.N bhii ho.n

pahale pahal kaa ishq abhii yaad hai 'Faraz'
dil Khud ye chaahataa hai ke rusvaa_iyaa.N bhii ho.n
.......

Aise chup hain k ye manzil bhii kaarii ho jaise

ab ke rut badalii to Khushbuu kaa safar dekhegaa kaun


ab ke rut badalii to Khushbuu kaa safar dekhegaa kaun
zaKhm phuulo.n kii tarah mahake.nge par dekhegaa kaun

dekhanaa sab raqs-e-bismal me.n magan ho jaaye.nge
jis taraf se tiir aayegaa udhar dekhegaa kaun

vo havas ho yaa vafaa ho baat maharuumii kii hai
log to phal-phuul dekhe.nge shajar dekhegaa kaun

[maharuum=deprived; shajar=tree]

ham chiraaG-e-shab hii jab Thahare to phir kyaa sochanaa
raat thii kis kaa muqaddar aur sahar dekhegaa kaun

[chiraaG-e-shab=night lamp]

aa fasiil-e-shahar se dekhe.n Ganiim-e-shahar ko
shahar jalataa ho to tujh ko baam par dekhegaa kaun

[fasiil-e-shahar=city wall/boundary; Ganiim-e-shahar=city's enemy]
............

ab ke tajdiid-e-vafaa kaa nahii.n imkaa.N jaanaa.N


ab ke tajdiid-e-vafaa kaa nahii.n imkaa.N jaanaa.N
yaad kyaa tujh ko dilaaye.N teraa paimaa.N jaanaa.N

[tajdiid=renewal; imkaa.N=possibility]
[jaanaa.N=dear one/beloved; paimaa.N=promise]

yuu.N hii mausam kii adaa dekh ke yaad aayaa hai
kis qadar jald badal jaate hai.n insaa.N jaanaa.N

zindagii terii ataa thii so tere naam kii hai
ham ne jaise bhii basar kii teraa ehasaa.N jaanaa.N

[ataa=given by; basar=to live; ehasaa.N=favour]

dil ye kahataa hai ki shaayad ho fasurdaa tuu bhii
dil kii kyaa baat kare.n dil to hai naadaa.N jaanaa.N

[fasurdaa=sad/disappointed]

avval-avval kii muhabbat ke nashe yaad to kar
bepiye bhii teraa cheharaa thaa gulistaa.N jaanaa.N

[avval-avval=the very first]

aaKhir aaKhir to ye aalam hai ki ab hosh nahii.n
rag-e-miinaa sulag uThii ki rag-e-jaa.N jaanaa.N

[rag=veins; miinaa=wine-holder; jaa.N=life]

muddato.n se ye aalam na tavaqqo na ummiid
dil pukaare hii chalaa jaataa hai jaanaa.N jaanaa.N

[muddat=awhile; tavaqqo=hope]

ham bhii kyaa saadaa the ham ne bhii samajh rakhaa thaa
Gam-e-dauraa.N se judaa hai Gam-e-jaanaa.N jaanaa.N

[Gam-e-dauraa.N=sorrows of the world]

ab kii kuchh aisii sajii mahafil-e-yaaraa.N jaanaa.N
sar-ba-zaanuu hai ko_ii sar-ba-girebaa.N jaanaa.N

[sar-ba-zaanuu=forehead touching the knees]
[sar-ba-girebaa.N=lost in worries]

har ko_ii apanii hii aavaaz se kaa.Np uThataa hai
har ko_ii apane hii saaye se hiraasaa.N jaanaa.N

[hiraasaa.N=scared of]

jis ko dekho vahii zanjiir-ba-paa lagataa hai
shahar kaa shahar huaa daaKhil-e-zindaa.N jaanaa.N

[zanjiir-ba-paa=feet encased in chains; zindaa.N=prison]

ab teraa zikr bhii shaayad hii Gazal me.n aaye
aur se aur huaa dard kaa unvaa.N jaanaa.N

[unvaa.N=start of chapter/title]

ham ki ruuThii hu_ii rut ko bhii manaa lete the
ham ne dekhaa hii na thaa mausam-e-hijraa.N jaanaa.N

[mausam-e-hijraa.N=season of separation]

hosh aayaa to sabhii Khvaab the rezaa-rezaa
jaise u.Date huye auraaq-e-pareshaa.N jaanaa.N

[rezaa-rezaa=piece by piece; auraaq-e-pareshaa.N=strewn pages of a book]
.............

ab kis kaa jashn manaate ho us des kaa jo taqsiim huaa


ab kis kaa jashn manaate ho us des kaa jo taqsiim huaa
ab kis ke giit sunaate ho us tan-man kaa jo do-niim huaa

[taqsiim=divided; do-niim=cut in two]

us Khvaab kaa jo rezaa rezaa un aa.Nkho.n kii taqadiir huaa
us naam kaa jo Tuka.Daa Tuka.Daa galiyo.n me.n be-tauqiir huaa

[rezaa-rezaa=pieces; be-tauqiir=disrespect]

us parcham kaa jis kii hurmat baazaaro.n me.n niilaam hu_ii
us miTTii kaa jis kii hurmat mansuub uduu ke naam hu_ii

[parcham=flag; hurmat=respect/honour; niilaam=auction]
[mansuub=nominated/appointed; uduu=enemy]

us jang ko jo tum haar chuke us rasm kaa jo jaarii bhii nahii.n
us zaKhm kaa jo siine pe na thaa us jaan kaa jo vaarii bhii nahii.n

[jang=war; vaaranaa=to offer in sacrifice]

us Khuun kaa jo bad_qismat thaa raaho.n me.n bahaayaa tan me.n rahaa
us phuul kaa jo beqiimat thaa aa.Ngan me.n khilaa yaa ban me.n rahaa

[ban=jungle]

us mashriq kaa jis ko tum ne neze kii anii marham samajhaa
us maGarib kaa jis ko tum ne jitana bhii luuTaa kam samajhaa

[mashriq=east; nezaa=spear; anii=spear's point]
[marham=salve/ointment; maGarib=west]

un maasuumo.n kaa jin ke lahuu se tum ne farozaa.N raate.n kii.n
yaa un mazaluumo.n kaa jis se Khanjar kii zubaa.N me.n baate.n kii.n

[farozaa.N=illuminate; mazaluum=oppressed]

us mariyam kaa jis kii iffat luTatii hai bhare baazaaro.n me.n
us iisaa kaa jo qaatil hai aur shaamil hai Gam_Khvaaro.n me.n

[iffat=chastity]

in nauhaagaro.n kaa jin ne hame.n Khud qatl kiyaa Khud rote hai.n
aise bhii kahii.n dam_saaz hue aise jallaad bhii hote hai.n

[nauhaagar=mourner; dam_saaz=supporting; jallaad=executioner (cruel)]

un bhuuke nange Dhaa.Ncho.n kaa jo raqs sar-e-baazaar kare.n
yaa un zaalim qazzaaqo.n kaa jo bhes badal kar vaar kare.n

[Dhaa.Nchaa=skeleton; raqs=dance; qazzaaq=dacoit]

yaa un JhuuTe iqaraaro.n kaa jo aaj talak aifaa na hue
yaa un bebas laachaaro.n kaa jo aur bhii dukh kaa nishaanaa hue

[aifaa=to fulfill]

is shaahii kaa jo dast-ba-dast aa_ii hai tumhaare hisse me.n
kyo.n nang-e-vatan kii baat karo kyaa rakhaa hai is qisse me.n

[shaahii=royal]

aa.Nkho.n me.n chhupaaye ashko.n ko ho.nTho.n me.n vafaa ke bol liye
is jashn me.n bhii shaamil huu.N nauho.n se bharaa kashkol liye

[nauhaa=lamentation; kashkol=beggar's bowl]

.............

ab naye saal kii mohalat nahii.n milane vaalii


ab naye saal kii mohalat nahii.n milane vaalii
aa chuke ab to shab-o-roz azaabo.n vaale

[mohalat=time; shab-o-roz=night and day; azaab=pain/misfortune]

ab to sab dashnaa-o-Khanjar kii zubaa.N bolate hai.n
ab kahaa.N log muhabbat ke nisaabo.n vaale

[dashnaa=dagger]

zindaa rahane kii tamannaa ho to ho jaate hai.n
faaKhtaao.n ke bhii kirdaar uqaabo.n vaale

na mere zaKhm khile hai.n na teraa rang-e-hinaa
mausam aaye hii nahii.n ab ke gulaabo.n vaale
............

aise chup hai.n ke ye manzil bhii ka.Dii ho jaise


aise chup hai.n ke ye manzil bhii ka.Dii ho jaise
teraa milanaa bhii judaa_ii ki gha.Dii ho jaise

apane hii saaye se har gaam laraz jaataa huu.N
raaste me.n ko_ii diivaar kha.Dii ho jaise

manzile.n duur bhii hai.n manzile.n nazadiik bhii hai.n
apane hii paao.n me.n zanjiir pa.Dii ho jaise

kitane naadaan hai.n tere bhulane vaale ke tujhe
yaad karane ke liye umr pa.Dii ho jaise

aaj dil khol ke roye hai.n to yuu.N Khush hai 'Faraz'
chand lamho.n kii ye raahat bhii ba.Dii ho jaise

...........

Ab ke ham bichre to shaayad kabhii Khvaabon mein milen

aashiqii be-dilii se mushkil hai


aashiqii be-dilii se mushkil hai
phir muhabbat usii se mushkil hai

ishq aaGaaz hii se mushkil hai
sabr karanaa abhii se mushkil hai

ham ?? aasaa.N hai.n aur hamaare liye
dushmanii dostii se mushkil hai

jis ko sab be-vafaa samajhate ho.n
bevafaa_ii usii se mushkil hai

ek do duusare se sahel na jaan
har ko_ii har kisii se mushkil hai

[sahel=approachable]

tuu baa-zid hai to jaa 'Faraz' magar
vaapasii us galii se mushkil hai
........

aa.Nkh se duur na ho dil se utar jaayegaa


aa.Nkh se duur na ho dil se utar jaayegaa
vaqt kaa kyaa hai guzarataa hai guzar jaayegaa

itanaa maanuus na ho Khilvat-e-Gam se apanii
tuu kabhii Khud ko bhii dekhegaa to Dar jaayegaa

[maanuus=intimate; Khilvat-e-Gam=sorrow of loneliness]

tum sar-e-raah-e-vafaa dekhate rah jaaoge
aur vo baam-e-rafaaqat se utar jaayegaa

[sar-e-raah-e-vafaa=path of love; baam-e-rafaaqat=responsibility towards love]

zindagii terii ataa hai to ye jaanevaalaa
terii baKhshiish terii dahaliiz pe dhar jaayegaa

[ataa=gift; baKhshiish=donation; dahaliiz=doorstep]

Duubate Duubate kashtii to ochhaalaa de duu.N
mai.n nahii.n ko_ii to saahil pe utar jaayegaa

[ochhaalaa=upward push]

zabt laazim hai magar dukh hai qayaamat kaa 'Faraz'
zaalim ab ke bhii na royegaa to mar jaayegaa
............

ab ke ham bichha.De to shaayad kabhii Khvaabo.n me.n mile.n


ab ke ham bichha.De to shaayad kabhii Khvaabo.n me.n mile.n
jis tarah suukhe hue phuul kitaabo.n me.n mile.n

Dhuu.NDh uja.De hue logo.n me.n vafaa ke motii
ye Khazaane tujhe mumkin hai Kharaabo.n me.n mile.n

[uja.De=desolated, ruined; Kharaab=bad]

tuu Khudaa hai na meraa ishq farishto.n jaisaa
dono.n insaa.N hai.n to kyo.n itane hijaabo.n me.n mile.n

[hijaab - veil, here it means barrier]

Gam-e-duniyaa bhii Gam-e-yaar me.n shaamil kar lo
nashaa ba.Dataa hai sharabe.n jo sharaabo.n me.n mile.n

aaj ham daar pe khe.nche gaye jin baato.n par
kyaa ajab kal vo zamaane ko nisaabo.n me.n mile.n

ab na vo mai.n huu.N na tu hai na vo maazii hai `Faraaz',
jaise do shaKhs tamannaa ke saraabo.n me.m mile.n

[maazii=past; saraab - illusion, mirage]